Tiger3: థియేటర్‌లో సల్మాన్‌-కత్రినా డ్యాన్స్‌.. వీడియో వైరల్‌

ఇంటర్నెట్‌ డెస్క్‌: ఈ మధ్యకాలంలో సినిమా తారలు థియేటర్‌కు వెళ్లి ప్రేక్షకులను ఆశ్చర్యపరచడం ట్రెండ్‌గా మారింది. తాజాగా బాలీవుడ్‌ స్టార్స్ సల్మాన్‌-కత్రినా కూడా ఇలానే ముంబయిలోని ఓ థియేటర్‌కు వెళ్లి ఆడిపాడారు. వీళ్లు ప్రధాన పాత్రలో నటించిన చిత్రం ‘టైగర్‌-3’. తాజాగా విడుదలైన ఈ సినిమా సూపర్ హిట్‌ అందుకుని మంచి వసూళ్లు సాధిస్తోంది. ఈ నేపథ్యంలో చిత్రబృందం ముంబయిలోని థియేటర్‌కు వెళ్లి అక్కడ అభిమానులతో ముచ్చటించింది. అభిమానుల కోరిక మేరకు ఆ సినిమాలోని ఓ పాటకు హుషారైన స్టెప్పులు వేసి కత్రినా-సల్మాన్‌ అలరించారు. దీనికి సంబంధించిన వీడియోను యశ్‌ రాజ్ ఫిల్మ్స్‌ ఎక్స్‌లో పంచుకుంది. ప్రస్తుతం ఆ వీడియో వైరల్‌గా మారింది.

యూట్యూబ్‌ ఛానల్‌ ప్రారంభించిన నాగ చైతన్య.. జాబ్‌ లేదంటూ ఆన్సర్‌!

ఈ సందర్భంగా సల్మాన్‌ మాట్లాడుతూ.. ‘నేను యాక్షన్ హీరోగా ఉన్నందుకు చాలా గర్వపడుతున్నా. అభిమానులు నాపై ఇంత అభిమానం చూపించడం అదృష్టంగా భావిస్తున్నా. ‘టైగర్-3’ విజయాన్ని అందుకోవడం ఆనందంగా ఉంది. ఇలాంటి జానర్‌ సినిమాలతో ప్రేక్షకులను మెప్పించడం అంత తేలికైన పని కాదు. యాక్షన్‌ సినిమాల్లోనూ కొత్తదనాన్ని ఆవిష్కరించాలి. ఇది హ్యాట్రిక్‌ విజయంతో సమానం. దీని కోసం ఫిట్‌నెస్‌పై కూడా ఎక్కువ దృష్టిపెట్టాను’ అని అన్నారు. ఇక ఈ సినిమా ఐదురోజుల్లో రూ.300 కోట్ల కలెక్షన్స్‌ రాబట్టింది.