BRO Movie: ‘బ్రో’ కోసం పవన్‌ ఉపవాసం.. 53 రోజుల్లోనే షూటింగ్‌ పూర్తి చేశాం: సముద్రఖని

‘బ్రో’ (BRO Movie) మూవీ కోసం అగ్ర కథానాయకుడు పవన్‌ కల్యాణ్‌ (Pawan kalyan) ఎంతో కష్టపడి పనిచేశారని, షూటింగ్‌ జరిగినన్ని రోజులు ఉపవాసం చేశారని చిత్ర దర్శకుడు, నటుడు సముద్రఖని (Samuthirakani) తెలిపారు. సాయిధరమ్‌ తేజ్‌ (Sai Dharam Tej) కథానాయకుడిగా పవన్‌ కీలక పాత్రలో రూపొందిన చిత్రమిది. తమిళంలో ఘన విజయం సాధించిన ‘వినోదయ సిత్తం’ రీమేక్‌గా ఇది తెరకెక్కుతోంది. అన్ని కార్యక్రమాలు పూర్తి చేసుకున్న ఈ సినిమా జులై 28న (Bro movie release date) ప్రేక్షకుల ముందుకు రానుంది. ఈ సందర్భంగా దర్శకుడు సముద్రఖని ఆసక్తికర విషయాలను పంచుకున్నారు.

అదే ‘బ్రో’ చిత్రానికి స్ఫూర్తి!

‘‘మా గురువు బాలచందర్‌తో కలిసి 2004లో ఒక డ్రామా చూశా. ‘ఎలా ఉంద’ని ఆయన అడిగితే, ‘బాగుంది సార్ కానీ, సామాన్యులకు చేరువయ్యేలా చేస్తే బాగుంటుంది’ అన్నాను. అప్పటి నుంచి ఆ కథ నాతో పయనిస్తూనే ఉంది. దానిని స్ఫూర్తిగా తీసుకొని 17 ఏళ్ళ తర్వాత సినిమాగా తీశా. అదే ‘వినోదయ సిత్తం’. ఆ స్టేజ్ ప్లే రచయిత డబ్బు ఇస్తానన్నా తీసుకోలేదు. సమాజానికి మనం మంచి సందేశం ఇవ్వాలని ప్లాన్ చేస్తే, సమాజం మనకి మంచి చేస్తుంది. ఈ సినిమా విషయంలో అదే జరిగింది. ఈ కథని అన్ని భాషలకు చేరువ చేయాలి. 12 భాషల్లో చేయాలని సన్నాహాలు చేస్తున్నాం’’

కాలమే వారిని తీసుకొచ్చింది!

‘‘మనం ఎప్పుడు ఏం చేయాలన్నది కాలమే నిర్ణయిస్తుంది. అప్పటికి వినోదయ సిత్తం విడుదలై పది రోజులే అవుతుంది. 73 ఏళ్ళ పెద్దాయన సినిమా చూసి బాగా ఎమోషనల్ అయ్యి నాకు ఫోన్‌ చేసి మరీ మాట్లాడారు. అంతలా మనుషులను ప్రభావితం చేసే చిత్రమిది. త్రివిక్రమ్ అన్నయ్య సహకారంతో ఇక్కడ ఈ సినిమా చేయగలిగాను. కథ చెప్పినప్పుడు క్లైమాక్స్‌ సంభాషణలు ఆయనకు బాగా నచ్చాయి. ఈ కథని ఎక్కువ మందికి చేరువ చెయ్యాలని, కళ్యాణ్ గారితో చేస్తే బాగుంటుందని త్రివిక్రమ్ చెప్పగానే ఒక్కసారిగా మాటల్లో చెప్పలేని ఆనందం కలిగింది. కాలమే త్రివిక్రమ్, పవన్‌కల్యాణ్‌లను ఈ ప్రాజెక్ట్ లోకి తీసుకొచ్చింది. మాతృకలోని ఆత్మను తీసుకుని, పవన్‌ స్టార్‌డమ్‌కు అనుగుణంగా మార్పులు చేశాం.’’

ఆ మాట అనగానే పవన్‌ షాకయ్యారు!

‘‘కళ్యాణ్‌గారిని కలిసి మొత్తం స్క్రిప్ట్ అంతా వినిపించాక, ‘షూటింగ్ ఎప్పటినుంచి అనుకుంటున్నారు’ అని అడిగారు. ‘మీరు రెడీ అంటే రేపటి నుంచే సార్’ అనగానే ఆయన షాక్ అయ్యారు. అలా ఆయనను కలిసిన మూడు రోజులకే షూటింగ్ స్టార్ట్ చేశాం. ఆయన సెట్‌లో అడుగుపెట్టగానే మొదట ఏం జరుగుతుందోనని మొత్తం గమనిస్తారు. దర్శకుడిగా నేను ఎంత క్లారిటీగా ఉన్నాను అనేది ఆయనకు మొదటిరోజే అర్థమైంది. సమయం వృథా చేయకూడదని సెట్‌లోనే కాస్ట్యూమ్స్ మార్చుకున్నారు. షూటింగ్ జరిగినన్ని రోజులు ఉపవాసం చేశారు. ఎంతో నిష్ఠతో పనిచేశారు”

‘శివ’లో ఆ పాత్ర కోసం మోహన్‌బాబు.. వద్దంటే వద్దన్న వర్మ!

53 రోజుల్లో సినిమా పూర్తి చేశాం!

‘‘బ్రో’ను 53 రోజుల్లో చేశాం. కానీ, విజువల్స్ చూస్తుంటే150 రోజులు షూట్ చేసిన సినిమాలా అవుట్ పుట్ ఉంటుంది. ఇప్పటిదాకా నేను చేసిన 15 సినిమాల్లో ఇదే నా బెస్ట్ మూవీ. ఈ సినిమా విషయంలో త్రివిక్రమ్ అన్నయ్య నాకు ఒక తండ్రిలా అండగా నిలబడ్డారు. నేను రచయితను అయినా కూడా ఈ సినిమాకు స్క్రీన్‌ప్లే, సంభాషణలు త్రివిక్రమ్‌తో రాయించడానికి కారణం ఉంది.  నేను సమష్టి కృషిని నమ్ముతా. ఇక్కడ నేటివిటీ మీద ఆయనకు ఉన్న పట్టు నాకుండదు. పైగా నన్ను నమ్మి ఇంత పెద్ద బాధ్యత నాకు అప్పగించడం నాకే ఆశ్చర్యం కలిగించింది. నేను ఆయనతో ‘అల వైకుంఠపురములో’ నుంచి ట్రావెల్ అవుతున్నా. కానీ ‘శంభో శివ శంభో’ సమయంలో నా గురించి సునీల్ చెప్పేవారట’’

నేను ఏదీ ప్లాన్‌ చేయలేదు!

‘‘ఒక చిన్న ఆర్టిస్ట్‌గా మొదలై, ఇప్పుడు పెద్ద స్టార్‌ని డైరెక్ట్ చేసే స్థాయికి రావడం వెనుక నేను ఏదీ ప్లాన్ చేసి చేయలేదు. దర్శకుడిగా ఇది నా 15 వ సినిమా. 1994 లో అసిస్టెంట్ డైరెక్టర్‌గా నా ప్రయాణం మొదలైంది. అప్పటినుంచి నా పని నేను చూసుకుంటూ, జయాపజయాలతో సంబంధం లేకుండా ముందుకు సాగుతున్నా. బుల్లితెర మీద నా ప్రతిభ చూసి ఎస్.పి. చరణ్ గారు నాకు మొదటి సినిమా అవకాశమిచ్చారు. మన పని మనం సరిగ్గా చేస్తుంటే అవకాశాలు వాటంతట అవే వస్తాయి. వచ్చిన అవకాశాలను మనం సద్వినియోగం చేసుకోవాలి’’