Suriya: అభిమానులకు సూర్య ప్రత్యేక విందు.. ఎందుకంటే!

ఇంటర్నెట్‌ డెస్క్‌: హీరోలు సూర్య (Suriya), కార్తి(karthi) సాయం చేయడంలో ఎప్పుడూ ముందుంటారు. తాజాగా వీరు మరోసారి మంచి మనసు చాటుకున్నారు. గతంలో మిగ్‌జాం తుపాను సమయంలో సూర్య ఫ్యాన్స్‌ వేలమంది బాధితులకు సాయం చేసిన సంగతి తెలిసిందే. తాజాగా ఆ అభిమానులకు సోదరులు విందు ఇచ్చారు. ప్రస్తుతం దీనికి సంబంధించిన ఫొటోలు వైరల్‌ అవుతున్నాయి.

గతేడాది డిసెంబర్‌లో వచ్చిన మిగ్‌జాం తుపాను దెబ్బకు చెన్నై మహా నగరం మొత్తం అతలాకుతలమైంది. సాధారణ ప్రజలతోపాటు సెలబ్రిటీలు కూడా ఇబ్బందులు పడ్డారు. ఆ సమయంలో తన అభిమానులందరూ స్వచ్ఛందంగా వచ్చి బాధితులను ఆదుకోవాలని కోరారు. రూ.10లక్షలు ఆర్థిక సాయం ప్రకటించారు. దీంతో తుపాను ప్రభావిత ప్రాంతాల్లో ఫ్యాన్స్‌ భోజనాలు ఏర్పాటు చేసి పలు సేవలు చేశారు. వారి సేవలను గుర్తించిన సూర్య వాళ్లందరినీ విందుకు ఆహ్వానించారు. వారికి స్వయంగా ఆయనే వడ్డించారు.

శివరాత్రి స్పెషల్‌.. ఈవారం అలరించే థియేటర్‌/ఓటీటీ చిత్రాలివే

సినిమాల విషయానికొస్తే.. ప్రస్తుతం సూర్య ‘కంగువా’లో నటిస్తున్నారు. శివ దర్శకత్వంలో తెరకెక్కుతోన్న ఈ సినిమాలో  ఆరు భిన్నమైన అవతారాల్లో కనిపించనున్నట్లు సమాచారం. ఐమ్యాక్స్‌, 3డీ వెర్షన్‌లోనూ ఇది అందుబాటులో ఉండనుంది. దిశా పఠానీ కథానాయికగా నటిస్తుండగా.. బాబీ దేవోల్‌ ప్రతినాయకుడిగా కనిపించనున్నారు. జగపతి బాబు, యోగిబాబు, కోవై సరళ తదితరులు కీలక పాత్రలు పోషిస్తున్నారు. వేసవి కానుకగా ఇది ప్రేక్షకుల ముందుకు రానుంది.