TANA: తానా ఫౌండేషన్‌ కొత్త కార్యవర్గం ఎన్నిక... ఛైర్మన్‌గా శశికాంత్‌

ఇంటర్నెట్‌ డెస్క్: ఉత్తర అమెరికా తెలుగు సంఘం (TANA)లో ముఖ్య విభాగమైన ఫౌండేషన్‌కు కొత్త కార్యవర్గం ఎన్నికైంది. ఫౌండేషన్‌ చైర్మన్‌గా శశికాంత్‌ వల్లేపల్లి, సెక్రటరీగా విద్యాధర్‌ గారపాటి, ట్రెజరర్‌గా వినయ్‌ మద్దినేని, జాయింట్‌ ట్రెజరర్‌గా కిరణ్‌ గోగినేని ఎన్నికయ్యారు. శశికాంత్‌ వల్లేపల్లి తానాలో మొదటి నుంచి మంచి దాతగా పేరు తెచ్చుకున్నారు. తానా ద్వారా ఎంతోమందికి సహాయాన్ని అందించారు. ఎన్నో ప్రాజెక్టులకు ఫండింగ్‌ కూడా చేస్తున్నారు. సేవాభావం, అందరితో కలిసిపోయే స్వభావం ఉన్న శశికాంత్‌ వల్లేపల్లి... కాంత్‌ ఫౌండేషన్‌ ద్వారా కూడా ఎన్నో సేవా కార్యక్రమాలను చేస్తున్నారు. కొవిడ్‌ మహమ్మారి సమయంలో తెలుగు రాష్ట్రాల్లో ఆయన చేసిన సహాయం మరచిపోలేనిది. తానా ఫౌండేషన్‌ చేయూత కార్యక్రమానికి కోఆర్డినేటర్‌గా వేలాది మంది విద్యార్థుల చదువుకు శశికాంత్‌ సహాయాన్ని అందించారు. తానా ఫౌండేషన్‌ ట్రజరర్‌గా, కార్యదర్శిగా కూడా శశికాంత్‌ వల్లేపల్లి గతంలో పనిచేశారు. 

విద్యా గారపాటి తానాలో కమ్యూనిటీకి సహాయం అందించేవారిలో మొదటివరుసలో ఉండే మనిషి. కమ్యూనిటీకి ఏదైనా సేవ చేయాలన్న సంకల్పంతో తానాలో చేరారు. తానాలో సేవా కార్యక్రమాలను నిర్వహిస్తూ అటు అమెరికాలోనూ, ఇటు తెలుగు రాష్ట్రాల్లోనివారికి సేవలందిస్తున్నారు. సొంత నిధుల నుంచి దాదాపు 75,000,00 డాలర్లను ఆయన ఇంతవరకు సేవా కార్యక్రమాలకు ఖర్చు పెట్టారు. అమెరికాలో తానా, నాటా, నాట్స్‌, టిటిఎ లాంటి జాతీయ తెలుగు సంఘాలు నిర్వహించే మహా సభలకు వచ్చేవారి దాహాన్ని తీర్చేందుకు లక్షల రూపాయల విలువ చేసే మంచినీటి బాటిళ్లను అందజేస్తున్నారు. ఇటీవల ఫిలడెల్పియాలో జరిగిన తానా మహాసభల్లో 70,000 వాటర్‌ బాటిళ్ళను అందజేశారు. తెలుగు రాష్ట్రాల్లో గ్రేస్‌ క్యాన్సర్‌ ఫౌండేషన్‌తో కలసి తానా ద్వారా క్యాన్సర్‌ నిర్దారణ శిబిరాలను నిర్వహించి ఎంతోమందికి చికిత్సకు సహాయాన్ని అందించారు. గతంలో తానా పబ్లిసిటీ కమిటీకి ఛైర్మన్‌గా మరియు న్యూజెర్సీ రీజియన్‌కు రీజనల్‌ కోఆర్డినేటర్‌గా పనిచేశారు. 

తానా ఫౌండేషన్‌కి ట్రెజరర్‌గా వినయ్‌ మద్దినేని ఎన్నికయ్యారు. ఆయన తానా ఎగ్జిక్యూటివ్‌ కమిటీలోనూ, ఇతర కమిటీల్లోనూ పని చేసి ప్రశంసలు అందుకున్నారు. ప్రస్తుతం ఫౌండేషన్‌ ట్రస్టీగా ఉన్న ఆయన... మెట్రో అట్లాంటా ప్రాంతంలో చురుకైన కమ్యూనిటీ నాయకుడు. తెలుగు అసోసియేషన్‌ ఆఫ్‌ మెట్రో అట్లాంటా (తామా)కి అధ్యక్షుడిగా, బోర్డు చైర్‌గానూ పనిచేశారు. కిరణ్‌ గోగినేని ఫౌండేషన్‌ జాయింట్‌ ట్రెజరర్‌గా ఎన్నికయ్యారు. ఇంతకుముందు తానాలో వివిధ పదవులను చేపట్టారు. అట్లాంటాకు చెందిన ఆయన 2019-2021 మధ్య తానా ప్రాంతీయ ప్రతినిధిగా సేవలందించారు. మెట్రో అట్లాంటా తెలుగు సంఘం (తామా), ఇండియన్‌ ఫ్రెండ్స్‌ ఆఫ్‌ అట్లాంటా తదితర సంస్థల్లో కీలక బాధ్యతలు నిర్వర్తించారు.