KL Rahul: ఐపీఎల్‌ 2024 సీజన్‌.. కేఎల్‌ రాహుల్ ఫిట్‌నెస్‌పై కీలక అప్‌డేట్

ఇంటర్నెట్ డెస్క్: ఐపీఎల్‌ (IPL) 2024 సీజన్‌ మరో నాలుగు రోజుల్లో ప్రారంభం కానుండగా లఖ్‌నవూ సూపర్‌ జెయింట్స్‌ (Lucknow Super Giants)కు తీపికబురు. కెప్టెన్‌ కేఎల్ రాహుల్ (KL Rahul) పూర్తిస్థాయి ఫిట్‌నెస్‌ సాధించినట్లు బెంగళూరులోని జాతీయ క్రికెట్ అకాడమీ ధ్రువీకరించింది. దీంతో రాహుల్ ఈ ఐపీఎల్‌ సీజన్‌లో ఆడేందుకు మార్గం సుగుమమైంది.  కానీ, టోర్నీ ప్రారంభదశలో వికెట్‌కీపింగ్‌కు దూరంగా ఉండి స్పెషలిస్ట్ బ్యాటర్‌గా బరిలోకి దిగాలని బీసీసీఐ వైద్యబృందం సూచించింది. రాహుల్ రెండ్రోజుల్లో లఖ్‌నవూ సూపర్‌ జెయింట్స్‌తో కలవనున్నాడు. మార్చి 24న రాజస్థాన్‌ రాయల్స్‌తో లఖ్‌నవూ తొలి మ్యాచ్‌ ఆడనుంది. ఇటీవల ఇంగ్లాండ్‌తో టెస్టు సిరీస్‌ మధ్యలో రాహుల్ గాయపడిన విషయం తెలిసిందే. లండన్‌ వెళ్లి ప్రత్యేక వైద్యబృందంతో చికిత్స చేయించుకుని భారత్‌కు తిరిగొచ్చాడు. ఫిట్‌నెస్‌ సాధించేందుకు నేరుగా జాతీయ క్రికెట్ అకాడమీకి వెళ్లాడు.