Adani Group: అంబుజాకు పునరుత్పాదక ఇంధనం.. అదానీ గ్రూప్‌ రూ.6 వేల కోట్ల వ్యయం!

Adani Group | దిల్లీ: అదానీ గ్రూప్‌ యాజమాన్యంలోని అంబుజా సిమెంట్స్‌ లిమిటెడ్‌ (Ambuja Cements Ltd) పునరుత్పాదక ఇంధన ప్రాజెక్టుల్లో రూ.6,000 కోట్లు పెట్టుబడిగా పెట్టనున్నట్లు ప్రకటించింది. 2025- 26 నాటికి ఈ మొత్తాన్ని వెచ్చించి 1,000 మెగావాట్ల సామర్థ్యాన్ని నెలకొల్పుతామని తెలిపింది.

గుజరాత్‌లో 600 మెగావాట్ల సౌర ఇంధనం, 150 మెగావాట్ల పవన విద్యుత్‌; రాజస్థాన్‌లో 250 మెగావాట్ల సౌర ఇంధన ప్రాజెక్టులు చేపట్టనున్నట్లు అంబుజా సిమెంట్స్‌ (Ambuja Cements Ltd) తెలిపింది. ఈ కంపెనీ క్రమంగా తమ ఉత్పత్తి సామర్థ్యాన్ని విస్తరించుకుంటోంది. ఏటా 140 మిలియన్‌ టన్నుల ఉత్పత్తిని అందుకోవాలని లక్ష్యంగా నిర్దేశించుకుంది. అయితే, తమ ఇంధన అవసరాల్లో 60 శాతం హరిత మార్గంలో సమకూర్చుకోవాలని యోచిస్తోంది. అందులో భాగంగానే తాజా పెట్టుబడులను ప్రకటించింది.

వచ్చే దశాబ్ద కాలంలో హరిత ఇంధన ప్రాజెక్టుల్లో 100 బిలియన్‌ డాలర్లు వెచ్చిస్తామని అదానీ గ్రూప్‌ (Adani Group) గతంలో ప్రకటించింది. 2050 నాటికి గ్రూపులోని ఐదు కంపెనీలు తటస్థ కర్బన ఉద్గార స్థాయిని అందుకోవాలని లక్ష్యంగా నిర్దేశించుకున్నాయి. వీటిలో అంబుజా సిమెంట్స్‌ సహా అదానీ గ్రీన్‌ ఎనర్జీ, అదానీ ఎనర్జీ సొల్యూషన్స్‌, అదానీ పోర్ట్స్‌ అండ్‌ సెజ్‌, ఏసీసీ ఉన్నాయి.