మాస్‌చిప్‌ టెక్నాలజీస్‌ ఆదాయాల్లో వృద్ధి

ఈనాడు, హైదరాబాద్‌: సెమీకండక్టర్‌, సాఫ్ట్‌వేర్‌, సిస్టమ్‌ డిజైన్‌ సేవల సంస్థ మాస్‌చిప్‌ టెక్నాలజీస్‌ 2023-24 పూర్తి కాలానికి ఏకీకృత ఖాతాల ప్రకారం రూ.293.91 కోట్ల ఆదాయాన్ని, రూ.9.9 కోట్ల నికర లాభాన్ని ఆర్జించింది. 2022-23తో పోల్చితే ఆదాయం 48%, నికరలాభం 62% పెరిగాయి. మార్చి త్రైమాసికంలో ఈ సంస్థ రూ.75.43 కోట్ల ఆదాయాన్ని,    రూ.7.82 కోట్ల ఎబిటా (వడ్డీ, పన్ను, తరుగుదల, ఇతర కేటాయింపుల కంటే ముందు ఆదాయం) నమోదు చేసింది. మానవ వనరుల అభివృద్ధిపై పెద్దఎత్తున పెట్టుబడులు పెడుతున్నందున సమీప భవిష్యత్తులో ప్రాజెక్టులను విజయవంతంగా నిర్వహించగలుగుతామని మాస్‌చిప్‌ టెక్నాలజీస్‌ ఈ సందర్భంగా పేర్కొంది. అమెరికాలోని సిలికాన్‌ వ్యాలీతో పాటు మనదేశంలోని హైదరాబాద్‌, బెంగళూరు,. అహ్మదాబాద్‌, పుణె కేంద్రాల్లో 1200 మంది నిపుణులు పనిచేస్తున్నట్లు వివరించింది. ఈ కేంద్రాల్లో టర్న్‌కీ డిజిటల్‌, మిక్స్‌డ్‌ సిగ్నల్‌ ఏఎస్‌ఐసీస్‌, డిజైన్‌ సర్వీసెస్‌, సెర్‌డెస్‌ ఐపీ, ఎంబెడెడ్‌ సిస్టమ్‌ డిజైన్‌ ప్రాజెక్టులు నిర్వహిస్తున్నట్లు పేర్కొంది.