అంతర్జాతీయ మొబైల్‌ నంబర్‌తోనూ యూపీఐ చెల్లింపులు: ఐసీఐసీఐ బ్యాంక్‌

దుబాయి: భారత్‌లో ఉన్న ప్రవాసులు (ఎన్‌ఆర్‌ఐ), అంతర్జాతీయ మొబైల్‌ నంబర్లతో యూపీఐ సేవలను ఉపయోగించుకునే వీలు కల్పిస్తున్నట్లు ఐసీఐసీఐ బ్యాంక్‌ సోమవారం ప్రకటించింది. ఎన్‌ఆర్‌ఐ ఖాతాదారులు తమ ఎన్‌ఆర్‌ఈ/ఎన్‌ఆర్‌ఓ బ్యాంకు ఖాతాకు అనుసంధానం చేసిన అంతర్జాతీయ మొబైల్‌ నంబరుతో యూపీఐ చెల్లింపులు చేయొచ్చని పేర్కొంది. ఐసీఐసీఐ బ్యాంక్‌ మొబైల్‌ బ్యాంకింగ్‌ యాప్‌ ఐమొబైల్‌ పే ద్వారా ఈ సేవలు అందుబాటులో ఉంటాయి.

ఇప్పటివరకు అమెరికా, యూకే, యూఏఈ, కెనడా, సింగపూర్‌, ఆస్ట్రేలియా, హాంకాంగ్‌, ఒమన్‌, ఖతార్‌, సౌదీ అరేబియాల్లోని ఎన్‌ఆర్‌ఐలు యూపీఐ సేవలను వాడాలంటే.. భారతీయ మొబైల్‌ నంబరును నమోదు చేయాల్సి ఉండేది. తాజా వెసులుబాటుతో ఈ పది దేశాల్లో నివసిస్తున్న ఎన్‌ఆర్‌ఐ వినియోగదారులకు ప్రయోజనం చేకూరనుందని ఐసీఐసీఐ బ్యాంక్‌ డిజిటల్‌ ఛానెల్స్‌ అండ్‌ పార్ట్‌నర్‌షిప్‌ హెడ్‌ సిద్ధార్థ మిశ్రా తెలిపారు. ప్రపంచ వ్యాప్తంగా యూపీఐ చెల్లింపుల వ్యవస్థను బలోపేతం చేసేందుకు ఇది తోడ్పడుతుందని భావిస్తున్నట్లు పేర్కొన్నారు.