ఆఫ్‌లైన్‌లోనూ ఇ-రుపీ

ముంబయి: ఇ-రుపీ లేదా సెంట్రల్‌ బ్యాంక్‌ డిజిటల్‌ కరెన్సీ(సీబీడీసీ)ని ఆఫ్‌లైన్‌ పద్ధతిలోనూ బదిలీ చేసేలా పనిచేస్తున్నట్లు రిజర్వ్‌ బ్యాంక్‌ ఆఫ్‌ ఇండియా(ఆర్‌బీఐ) గవర్నర్‌ శక్తికాంత దాస్‌ పేర్కొన్నారు. నెట్‌వర్క్‌ అనుసంధానం అవసరం లేకుండా నగదులాగే ఉపయోగించుకునేందుకు ఈ పద్ధతి వీలు కల్పిస్తుందన్నారు. ఈ ఏడాది ఫిబ్రవరిలో సీబీడీసీకి ఆఫ్‌లైన్‌, ప్రోగ్రామబులిటీ ఫీచర్లను దాస్‌ ప్రకటించిన విషయం తెలిసిందే. ప్రోగ్రామబులిటీ ఫీచర్‌ వల్ల నిర్దిష్ట/లక్షిత అవసరాలకు లావాదేవీలు జరపొచ్చని, పేదలున్న ప్రాంతాలు లేదా ఇంటర్నెట్‌ పరిమితంగా ఉన్న ప్రదేశాల్లో ఆఫ్‌లైన్‌ పద్ధతిలో లావాదేవీలు జరపొచ్చని సోమవారమిక్కడ జరిగిన బీఐఎస్‌ ఇన్నోవేషన్‌ సమిట్‌లో ఆయన పేర్కొన్నారు.