పొదుపు పథకాలకు పాన్‌, ఆధార్‌ తప్పనిసరి

ఆర్థిక శాఖ

ఈనాడు, హైదరాబాద్‌: చిన్న మొత్తాల పొదుపు పథకాల్లో మదుపు చేసేవారు ఇక నుంచి తమ ఆధార్‌, పాన్‌ (శాశ్వత ఖాతా సంఖ్య) వివరాలు తప్పనిసరిగా సమర్పించాలని కేంద్ర ఆర్థిక శాఖ నోటిఫికేషన్‌ జారీ చేసింది. దీంతో ప్రజా భవిష్య నిధి, సుకన్య సమృద్ధి యోజన, సీనియర్‌ సిటిజన్‌ సేవింగ్‌ స్కీం, పోస్టాఫీసు సేవింగ్‌ స్కీం వంటి పథకాల్లో మదుపు చేసేవారు ఈ రెండింటినీ సమర్పించాల్సి ఉంటుంది. ఈ పొదుపు ఖాతాల్లో రూ.50వేలకు మించి జమ చేసేవారు తప్పనిసరిగా పాన్‌ తెలియజేయాల్సి ఉంటుంది. ఇప్పటికే ఆధార్‌ వివరాలు ఇవ్వకుండా, ఈ ఖాతాలు ప్రారంభించిన చందాదారులు సెప్టెంబరు 30లోగా ఆధార్‌  సమ ర్పించాల్సి ఉంటుంది. కొత్త ఖాతాలు ప్రారంభించేవారు తప్పనిసరిగా ఆధార్‌ తెలియజేయాల్సిందే. లేదా ఖాతా ప్రారంభించిన ఆరు నెలల్లోపు ఆధార్‌ నంబర్‌ను నమోదు చేయకపోతే, ఖాతా స్తంభింపజేస్తారు. అన్ని ఖాతాల్లో కలిసి రూ.లక్షకు మించి జమ చేసిన సందర్భంలోనూ, ఒక నెలలో ఉపసంహరణలు(విత్‌డ్రా) రూ.10వేలు దాటినప్పుడూ పాన్‌ తప్పనిసరి. లేకపోతే ఖాతాల్లో లావాదేవీలు జరిపేందుకు అవకాశం ఉండదని ఆర్థిక మంత్రిత్వ శాఖ నోటిఫికేషన్‌ స్పష్టం చేసింది.