10 కిలోల పెంపుడు జంతువు క్యాబిన్‌లోనే

ఆకాశ ఎయిర్‌

దిల్లీ: తమ దేశీయ విమానాల క్యాబిన్‌లో 10 కిలోల లోపున్న పెంపుడు జంతువులను అనుమతిస్తున్నట్లు ఆకాశ ఎయిర్‌ ప్రకటించింది. ప్రయాణికుల అభిప్రాయాలు తెలుసుకున్నాకే, ఈ నిర్ణయం తీసుకున్నట్లు సంస్థ వెల్లడించింది. 2022 నవంబరులో ఈ విమానయాన సంస్థ పెంపుడు పిల్లులు, శునకాలను ప్రయాణికులు తమ వెంట తీసుకెళ్లేందుకు వీలు కల్పించింది. వాటి బరువు ఆధారంగా క్యాబిన్‌ లేదా కార్గోలో వీటిని అనుమతించేది. ఈ సేవలను విస్తరించడంలో భాగంగా 10 కిలోల (కంటైనర్‌ సహా) వరకూ బరువు ఉండే వాటిని క్యాబిన్‌లోనే తీసుకెళ్లేందుకు అవకాశం కల్పిస్తూ తాజాగా నిర్ణయించింది. ఇప్పటివరకు ఇది 7 కిలోలుగా ఉంది. కార్గోలో 32 కిలోల వరకు బరువున్న పెంపుడు జంతువులకు ఆకాశ ఎయిర్‌ అనుమతిస్తోంది. 2022 నవంబరులో ఈ సేవలను ప్రారంభించినప్పటి నుంచి ఇప్పటివరకు 3,200లకు పైగా పెంపుడు జంతువులు తమ విమానాల్లో ప్రయాణించినట్లు తెలిపింది.

ఆకాశ ఎయిర్‌తోపాటు ఎయిర్‌ ఇండియా కూడా పెంపుడు జంతువులను క్యాబిన్‌లో, స్పైస్‌జెట్‌ కార్గోలో అనుమతిస్తున్నాయి. ఇండిగో, ఎయిర్‌ ఇండియా ఎక్స్‌ప్రెస్‌ ఇప్పటి వరకు ఈ సేవలను అందించడం లేదు. ఎయిర్‌ ఇండియా ఎక్స్‌ప్రెస్‌ సర్వీస్‌ జంతువులను అనుమతినిస్తోంది.