నగదు రుణాలు రూ.20వేల లోపే!

ఎన్‌బీఎఫ్‌సీలకు ఆర్‌బీఐ ఆదేశాలు

ముంబయి: నగదు రూపంలో ఇచ్చే రుణాలు రూ.20వేలకు మించకుండా ఉండాలని బ్యాంకింగేతర ఆర్థిక సంస్థ (ఎన్‌బీఎఫ్‌సీ)లకు రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) ఆదేశాలు జారీ చేసిందని సమాచారం. నగదు లావాదేవీల విషయంలో కచ్చితంగా నిబంధనలు పాటించాలని ఆర్‌బీఐ పేర్కొందని తెలుస్తోంది. ఆదాయపు పన్ను చట్టం 1961 నిబంధనల్లోని సెక్షన్‌ 269ఎస్‌ఎస్‌ ప్రకారం ఒక వ్యక్తికి రూ.20వేలకు మించి నగదు రూపంలో రుణం ఇవ్వకూడదనే నిబంధన ఉందని గుర్తు చేసింది. అందువల్ల ఎన్‌బీఎఫ్‌సీలు ఈ పరిమితికి మించి నేరుగా నగదు రుణాలు ఇవ్వకూడదని పేర్కొంది. చట్టపరమైన నిబంధనను ఉల్లంఘిస్తూ.. ఐఐఎఫ్‌ఎల్‌ ఫైనాన్స్‌, నగదు రూపంలో రుణాలు ఇవ్వడంతో పాటు, వసూలు చేసినట్లుగా తేలడంతో, ఆర్‌బీఐ మరోసారి ఈ విషయాన్ని స్పష్టం చేసినట్లు తెలుస్తోంది. దీనిపై స్పందించేందుకు ఆర్‌బీఐని సంప్రదిస్తే, ఎలాంటి సమాధానమూ రాలేదని వార్తా సంస్థ రాయిటర్స్‌ పేర్కొంది.