ఆండ్రాయిడ్‌ మొబైల్‌లో గూగుల్‌ వాలెట్‌ యాప్‌

దిల్లీ: భారత్‌లో ఆండ్రాయిడ్‌ ఆపరేటింగ్‌ సిస్టమ్‌తో పనిచేసే మొబైల్స్‌ కోసం గూగుల్‌ వాలెట్‌ యాప్‌ను టెక్‌ దిగ్గజం గూగుల్‌ ఆవిష్కరించింది. బోర్డింగ్‌ పాసులు, లాయల్టీ కార్డులు, టికెట్లు, ప్రభుత్వ రవాణా పాసులు.. తదితరాలను భద్రంగా నిల్వ చేసుకునేందుకు ఈ వాలెట్‌ వీలు కల్పిస్తుంది. బుధవారం నుంచే ఈ డిజిటల్‌ వాలెట్‌ అందుబాటులోకి వచ్చిందని గూగుల్‌ జీఎమ్‌, ఇండియా ఇంజినీరింగ్‌ లీడ్‌ రామ్‌ పాపట్ల పేర్కొన్నారు. ‘గూగుల్‌ పే మా ప్రాథమిక చెల్లింపు యాప్‌గా కొనసాగుతుంది. గూగుల్‌ వాలెట్‌ అనేది చెల్లింపేతర సేవల కోసం ప్రత్యేకంగా తీసుకువచ్చామ’ని తెలిపారు.

ఈ బ్రాండ్లతో భాగస్వామ్యం: కొత్త సేవల కోసం ఎయిరిండియా, ఇండిగో, ఫ్లిప్‌కార్ట్‌, పైన్‌ ల్యాబ్స్‌, కొచ్చి మెట్రో, పీవీఆర్‌, ఐనాక్స్‌ వంటి 20 భారతీయ బ్రాండ్లతో గూగుల్‌ భాగస్వామ్యం కుదుర్చుకుంది. రాబోయే కొద్ది నెలల్లో మరిన్ని బ్రాండ్లనూ జత చేసుకోనున్నట్లు రామ్‌ తెలిపారు. 

ఇవీ దాచుకోవచ్చు: సినిమా/ఈవెంట్‌ టికెట్లు, బోర్డింగ్‌పాసులు, మెట్రో టికెట్లు, కార్పొరేట్‌ బ్యాడ్జ్‌లు, భౌతిక పత్రాల డిజిల్‌ వర్షన్‌లను ఈ వాలెట్‌లో దాచుకోవచ్చు. 

ఆల్‌-ఇన్‌-ఒన్‌ యాప్‌ త్వరలో: త్వరలోనే చెల్లింపులు, చెల్లింపేతర సేవలు కలగలిపి ఒకే యాప్‌(ఆల్‌ ఇన్‌ ఒన్‌)లో తీసుకువచ్చే ఆలోచన కంపెనీకి ఉందని రామ్‌ వివరించారు. భద్రత, గోప్యత పునాదులపై గూగుల్‌ వాలెట్‌ను నిర్మించినట్లు తెలిపారు. ప్రస్తుతం 80 దేశాల్లో గూగుల్‌ వాలెట్‌ సేవలందిస్తోంది.