ట్రేడింగ్‌ సమయం పొడిగింపు లేనట్లే

ఎన్‌ఎస్‌ఈ ప్రతిపాదనను తిరస్కరించిన సెబీ

దిల్లీ: ఈక్విటీ డెరివేటివ్స్‌ విభాగంలో ట్రేడింగ్‌ సమయాన్ని పొడిగించేందుకు నేషనల్‌ స్టాక్‌   ఎక్స్ఛేంజీ (ఎన్‌ఎస్‌ఈ) సమర్పించిన ప్రతిపాదనను కేపిటల్‌ మార్కెట్ల నియంత్రణ సంస్థ సెబీ తిరస్కరించింది. స్టాక్‌ బ్రోకర్ల నుంచి సానుకూల అభిప్రాయాలు అందకపోవడమే ఇందుకు కారణంగా సెబీ పేర్కొంది. ‘సెబీ మా దరఖాస్తును తిరస్కరించడంతో ప్రస్తుతం ట్రేడింగ్‌ సమయాన్ని పొడిగించే యోచన చేయడం లేద’ని ఎన్‌ఎస్‌ఈ ఎండీ, సీఈఓ ఆశిష్‌ కుమార్‌ చౌహాన్‌ తెలిపారు.ఈక్విటీ డెరివేటివ్స్‌లో ట్రేడింగ్‌ సమయం పొడిగింపును దశలవారీగా అమలు చేసేందుకు, సెబీకి ఎన్‌ఎస్‌ఈ దరఖాస్తు పెట్టుకున్న సంగతి తెలిసిందే. మరోవైపు ఎన్‌ఎస్‌ఈ ఐపీఓకు సెబీ అనుమతుల కోసం చూస్తున్నట్లు  చౌహాన్‌ వెల్లడించారు.