అయిదేళ్ల కనిష్ఠానికి పొదుపు

2020-21 నుంచి 2022-23 వరకు రూ.9 లక్షల కోట్లు తగ్గింది
ఫండ్‌లలో మదుపు మూడురెట్లు; షేర్లు, డిబెంచర్లలో రెట్టింపు

దిల్లీ: దేశంలో కుటుంబాల నికర పొదుపు గణనీయంగా తగ్గుతోంది. 2020-21తో పోలిస్తే, 2022-23 ఆర్థిక సంవత్సరం చివరకు కుటుంబాల నికర పొదుపు రూ.9 లక్షల కోట్లు తగ్గి రూ.14.16 లక్షల కోట్లకు పరిమితమైంది. ఇది అయిదేళ్ల కనిష్ఠ స్థాయి. గణాంకాలు, కార్యక్రమాల అమలు మంత్రిత్వ శాఖ విడుదల చేసిన తాజా గణాంకాల ప్రకారం.. 2020-21లో కుటుంబాల నికర పొదుపు రూ.23.29 లక్షల కోట్ల వద్ద గరిష్ఠ స్థాయికి తాకింది. ఆ తర్వాత నుంచి తగ్గుతూ వచ్చింది. 2021-22లో ఇది రూ.17.12 లక్షల కోట్లకు దిగి రాగా.. 2022-23లో రూ.14.16 లక్షల కోట్లకు తగ్గింది. 2017-18లో నమోదైన రూ.13.05 లక్షల కోట్ల తర్వాత ఇదే కనిష్ఠ స్థాయి. ఆ తర్వాత 2018-19లో రూ.14.92 లక్షల కోట్లకు, 2019-20లో రూ.15.49 లక్షల కోట్లకు కుటుంబాల పొదుపు పెరుగుతూ వచ్చింది.

• 2020-21 నుంచి 2022-23 మధ్య మ్యూచువల్‌ ఫండ్లలో కుటుంబాల మదుపు మూడు రెట్లు పెరిగింది. 2020-21లో ఫండ్‌లలో పెట్టుబడులు రూ.64,084 కోట్లుగా ఉండగా.. 2022-23లో రూ.1.79 లక్షల కోట్లకు చేరాయి. 2021-22లో ఇది రూ.1.6 లక్షల కోట్లుగా నమోదైంది.
• షేర్లు, డిబెంచర్లలో పెట్టుబడులు కూడా దాదాపు రెట్టింపయ్యాయి. 2020-21లో రూ.1.07 లక్షల కోట్ల నుంచి 2022-23లో రూ.2.06 లక్షల కోట్లకు చేరాయి. 2021-22లో రూ.2.14 లక్షల కోట్లుగా నమోదయ్యాయి.
• కుటుంబాల బ్యాంకు రుణాలు 2022-23 వరకు మూడేళ్ల కాలంలో రెట్టింపై రూ.11.88 లక్షల కోట్లుగా నమోదయ్యాయి. 2020-21లో ఇవి రూ.6.05 లక్షల కోట్లుగాను; రూ.2021-22లో రూ.7.69 లక్షల కోట్లుగాను ఇవి ఉన్నాయి.
• కార్పొరేషన్లు, బ్యాంకింగేతర సంస్థల నుంచి కుటుంబాల రుణాలు 2020-21లో రూ.93,723 కోట్లుగా ఉండగా.. 2022-23లో నాలుగు రెట్లు పెరిగి రూ.3.33 లక్షల కోట్లకు చేరాయి. 2021-22లో రూ.1.92 లక్షల కోట్లుగా ఇవి నమోదయ్యాయి.