Maruti Suzuki: మారుతీ లాభం 42% వృద్ధి.. ఒక్కో షేరుపై 90 డివిడెండ్‌

దిల్లీ: దేశీయ అతిపెద్ద కార్ల తయారీ సంస్థ మారుతీ సుజుకీ (Maruti Suzuki) ఆకర్షణీయమైన త్రైమాసిక ఫలితాలను ప్రకటించింది. గత ఆర్థిక సంవత్సరం చివరి త్రైమాసికంలో (Q4 results) స్టాండలోన్‌ పద్ధతిన రూ.2,671 కోట్ల నికర లాభాన్ని నమోదు చేసింది. గతేడాది ఇదే త్రైమాసికంలో రూ.1,876 కోట్లతో పోలిస్తే లాభం 42 శాతం వృద్ధి చెందింది. కార్యకలాపాల ఆదాయం సైతం రూ.26,749 కోట్ల నుంచి 20 శాతం వృద్ధి చెంది రూ.32,060 కోట్లుగా నమోదైంది.

2022-23 మొత్తం ఆర్థిక సంవత్సరానికి గానూ రూ.8,211 కోట్ల నికర లాభాన్ని మారుతీ ప్రకటించింది. 2021-22 ఆర్థిక సంవత్సరంలో ఈ మొత్తం రూ.3,879 కోట్లుగా ఉంది. 2021-22 ఆర్థిక సంవత్సరంలో రూ.88,330 కోట్ల విలువైన వాహనాలను మారుతీ విక్రయించగా.. 2022-23 ఆర్థిక సంవత్సరంలో రూ.1,17,571 కోట్ల విలువైన వాహనాలను మారుతీ విక్రయించింది.

2022-23 ఆర్థిక సంవత్సరానికి డివిడెండ్‌ చెల్లింపులకూ బోర్డు ఆమోదం తెలిపింది. ఒక్కో షేరుకు రూ.90 చొప్పున చెల్లించేందుకు నిర్ణయించింది. అలాగే వాహన ఉత్పత్తి సామర్థ్యాన్ని    పెంచేందుకూ బోర్డు ఆమోదం తెలిపింది. ప్రస్తుతం మనేసర్‌, గురుగ్రామ్‌ ప్లాంట్లలో వార్షిక సామర్థ్యం 13 లక్షలు ఉండగా.. మరో 10 లక్షల మేర ఉత్పత్తి సామర్థ్యాన్ని పెంచేందుకు బోర్డు సూత్రప్రాయ ఆమోదం తెలిపింది. ఫలితాల నేపథ్యంలో మంగళవారం నాడు బీఎస్‌ఈలో మారుతీ షేరు రూ.8,503.15 వద్ద ఫ్లాట్‌గా ముగిసింది.