OLA Electric: ఐపీఓకు ఓలా ఎలక్ట్రిక్‌ దరఖాస్తు

దిల్లీ: తొలి పబ్లిక్‌ ఆఫర్‌ (IPO) ద్వారా నిధులు సమీకరించేందుకు మార్కెట్ల నియంత్రణ సంస్థ సెబీ (SEBI) వద్ద విద్యుత్‌ ద్విచక్రవాహన కంపెనీ ఓలా ఎలక్ట్రిక్‌ శుక్రవారం ముసాయిదా పత్రాలు దాఖలు చేసింది. గత 20 ఏళ్లలో మన దేశంలో ఐపీఓకు రానున్న తొలి వాహన సంస్థ ఇదే కావడం విశేషం. ముసాయిదా పత్రాల ప్రకారం.. ఐపీఓలో రూ. 5,500 కోట్ల విలువైన తాజా ఈక్విటీ షేర్లను, ఆఫర్‌ ఫర్‌ సేల్‌లో 95,191,195 ఈక్విటీ షేర్లను విక్రయించనున్నారు. ఐపీఓ ద్వారా వచ్చిన నిధులను మూల ధన వ్యయాల, ఓలా గిగాఫ్యాక్టరీ ప్రాజెక్ట్‌, అనుబంధ సంస్థ ఓఈటీ రుణాల చెల్లింపు, పరిశోధనా, ఉత్పత్తుల అభివృద్ధికి పెట్టుబడులు, సాధారణ కార్పొరేట్‌ అవసరాల కోసం వినియోగించనుంది. కంపెనీ విద్యుత్‌ స్కూటర్లతోపాటు, బ్యాటరీ ప్యాక్స్‌, మోటార్ల వంటి విడిభాగాలను ఉత్పత్తి చేస్తోంది.