Vibhor Steel Listing: అదరగొట్టిన విభోర్‌ స్టీల్‌ షేర్లు.. ఒక్కో లాట్‌పై ₹27,126 లాభం

ముంబయి: స్టీల్‌ పైపుల తయారీ సంస్థ విభోర్‌ స్టీల్‌ ట్యూబ్స్‌ షేర్లు అరంగేట్రంలో అదరగొట్టాయి. ఐపీఓలో ఇష్యూ ధర రూ.151 కాగా.. ఎన్‌ఎస్‌ఈలో ఈ షేరు 181.46 శాతం లాభంతో రూ.425 దగ్గర లిస్టయ్యింది. (Vibhor Steel Tubes Listing). బీఎస్‌ఈలో 178.81 శాతం పుంజుకొని రూ.421 దగ్గర ట్రేడింగ్‌ ప్రారంభించింది. తర్వాత షేరు విలువ 192.72 శాతం పెరిగి రూ.442 దగ్గర అప్పర్‌ సర్క్యూట్‌ని తాకింది.

ఐపీఓలో కనీసం రూ.14,949తో 99 షేర్లు (ఒక లాట్‌) సబ్‌స్క్రైబ్‌ చేసుకోవాలని విభోర్‌ స్టీల్‌ ట్యూబ్స్‌  నిర్దేశించింది. దీంతో లిస్టింగ్‌లో మదుపర్లు ఒక్కో లాట్‌పై రూ.27,126 లాభాన్ని పొందారు. అప్పర్‌ సర్క్యూట్‌ వద్ద రూ.28,809 ఆర్జించినట్లయింది. లిస్టింగ్‌లో కంపెనీ మార్కెట్‌ విలువ బీఎస్‌ఈలో రూ.838.14 కోట్లుగా నమోదైంది. ఈ ఐపీఓ (IPO) ఫిబ్రవరి 13- 15 మధ్య జరిగింది. షేర్ల ధరల శ్రేణి రూ.141-151గా నిర్ణయించారు.

ఐపీఓ (Vibhor Steel Tubes IPO) ద్వారా సమీకరించిన నిధులను నిర్వహణ మూలధనం, సాధారణ కార్పొరేట్‌ అవసరాలకు వినియోగించనున్నట్లు విభోర్‌ స్టీల్‌ ట్యూబ్స్‌ తెలిపింది. భారీ ఇంజినీరింగ్‌ పరిశ్రమల్లో ఉపయోగించే అత్యున్నత నాణ్యత కలిగిన స్టీల్‌ ట్యూబులు, పైపులను ఈ కంపెనీ తయారు చేస్తుంటుంది. చమురు, నీరు, గ్యాస్‌ సరఫరా చేసే వాటితో పాటు వ్యవసాయ అవసరాల కోసం వినియోగించే పైపులనూ అందిస్తుంది. రోడ్లకు ఇరువైపులా ఏర్పాటు చేసే లోహపు బ్యారియర్లను సైతం తయారు చేస్తుంది. జిందాల్ పైప్స్‌ ఈ కంపెనీ ప్రధాన కస్టమర్లలో ఒకటి.