ప్రారంభమైన వేసవి క్రికెట్ శిక్షణ శిబిరం

ఆదిలాబాద్ క్రీడావిభాగం: జిల్లా కేంద్రంలోని ఇందిరా ప్రియదర్శిని క్రీడా ప్రాంగణంలో గురువారం హైదరాబాద్ క్రికెట్ సంఘం ఆధ్వర్యంలో వేసవి క్రికెట్ శిక్షణ శిబిరం ప్రారంభమైంది. ఈ కార్యక్రమానికి ముఖ్య అతిథిగా రిజర్వ్ ఇన్ స్పెక్టర్ మురళీ హాజరై శిక్షణ శిబిరాన్ని ప్రారంభించారు. అంతకుముందు ఆయన మాట్లాడుతూ విద్యార్థులు వేసవి సెలవుల్లో సమయాన్ని వృథా చేయకుండా ఈ శిక్షణ శిబిరాన్ని  సద్వినియోగం చేసుకోవాలని, ఉన్నత లక్ష్యంతో శిక్షకులు నేర్పించిన అంశాలను నిరంతరం సాధన చేయాలని ఆకాంక్షించారు. సెల్ ఫోన్లకు దూరంగా ఉండాలని, క్రమశిక్షణ, మంచి ఆహార నియమాలు పాటించాలని సూచించారు. కాసేపు బ్యాటింగ్,  బౌలింగ్ చేసి వర్ధమాన క్రీడాకారులను ఉత్సాహపరిచారు. ఆయన వెంట సీనియర్ క్రీడాకారులు రజియుద్దీన్, అతవులాఖాన్, మసూద్, క్రికెట్ కోచ్ విజయ్ కుమార్ తదితరులు ఉన్నారు.