Vikarabad: ఐరాసలో బషీరాబాద్‌ యువకుడి ప్రసంగం

జెనీవాలో మాట్లాడుతున్న సాయిసంపత్‌

బషీరాబాద్‌: స్విట్జర్‌ల్యాండ్‌లోని జెనీవాలో మార్చి 11 నుంచి 23 వరకు జరిగిన 55వ ఐక్యరాజ్యసమితి మానవ హక్కులు సమావేశంలో వికారాబాద్‌ జిల్లా బషీరాబాద్‌ మండలం బద్లాపూర్‌కు చెందిన సాయి సంపత్‌ పాల్గొన్నారు. ఎంఏ పూర్తి చేసిన ఆయన ఓ స్వచ్ఛంద సంస్థలో ప్రతినిధిగా కొనసాగుతున్నారు. సమావేశంలో పాల్గొని తిరిగి వచ్చిన ఆయన శుక్రవారం ‘న్యూస్‌టుడే’తో మాట్లాడుతూ.. రెండు వారాలపాటు  ‘వాతావరణ మార్పు- ఆహార భద్రతపై ప్రభావం’  అనే అంశంపై ప్రసంగించానని చెప్పారు. విదేశీ కలుపు మొక్కల నియంత్రణపై ప్రపంచ దేశాలు అనుసరించాల్సిన అంశాలపై సూచనలు అందించామన్నారు. ఈ సమస్యను అధిగమించేందుకు రసాయనిక  మందులను ఉపయోగించడంతో నేల, నీరు, వాతావరణం కలుషితమవుతోందని వివరించినట్లు తెలిపారు. సహజ పద్ధతిలో కలుపు తొలగించేందుకు, ఉపాధి హామీ పథకానికి జోడించాలని, ఎనిమిదేళ్ల పాటు ఈ విధానాన్ని అనుసరిస్తే విదేశీ కలుపు అంతరిస్తుందన్నారు. ఈ అంశంతో పాటు విద్య, రోడ్లు, రాజకీయాల అంశాలపై మాట్లాడానని చెప్పారు.