అహోబిలంలో ఘనంగా స్వాతి వేడుకలు

ఆళ్లగడ్డ గ్రామీణం: ప్రముఖ వైష్ణవ క్షేత్రమైన అహోబిలంలో గురువారం స్వాతి వేడుకలు ఘనంగా నిర్వహించారు. స్వామి జన్మ నక్షత్రం స్వాతి కావడంతో తెల్లవారుజామున స్వామి మూల విగ్రహాన్ని సుప్రభాత సేవతో మేల్కొల్పి నిత్య పూజలు చేశారు. ప్రహ్లాద వరద స్వామి, శ్రీదేవి, భూదేవి, సుదర్శన మూర్తిని అలంకరించి ఆలయముఖ ద్వారం మండపంలో కొలువుంచారు. స్వామి అమ్మవార్లకు ఎదురుగా హోమగుండం ఏర్పాటు చేసి స్వాతి సుదర్శన హోమం నిర్వహించారు. హోమం నుంచి వెలువడిన కాటుకను భక్తులు స్వీకరించి స్వామిని ఆరాధించారు. అనంతరం అర్చకులు స్వామికి మహా మంగళహారతి అందించి భక్తులకు తీర్థప్రసాద వితరణ చేశారు. ఆలయ ప్రధాన అర్చకులు వేణుగోపాలన్, మఠం ప్రతినిధి సంపత్ ఆధ్వర్యంలో వేడుకలు నిర్వహించారు.