త్రిముఖ పోరు.. పాగా వేసేదెవరు..?

 జహీరాబాద్‌లో ప్రధాన పార్టీల ముమ్మర ప్రయత్నం 

ఈనాడు, కామారెడ్డి : గతంలో ఎన్నడూ లేని విధంగా జహీరాబాద్‌ లోక్‌సభ స్థానంలో ఈసారి త్రిముఖ పోరు నెలకొంది. కామారెడ్డి, సంగారెడ్డి జిల్లాల్లోని ఏడు అసెంబ్లీ నియోజకవర్గాలతో ఏర్పడిన జహీరాబాద్‌ పార్లమెంటు నియోజకవర్గంలో ఇప్పటివరకు మూడుసార్లు ఎన్నికలు జరిగాయి. 2009లో కాంగ్రెస్‌(సురేష్‌ షెట్కార్‌), 2014, 2019లో తెరాస(బీబీపాటిల్‌) అభ్యర్థులు విజయం సాధించారు. కాంగ్రెస్‌, భాజపా, భారాస అభ్యర్థులు ఎవరికివారు ఎత్తులు పైఎత్తులు వేస్తూ ప్రచారం నిర్వహిస్తుండడంతో సార్వత్రిక పోరు ఆసక్తి రేకెత్తిస్తోంది.

అసెంబ్లీకి, లోక్‌సభకు మారుతున్న ఓటరునాడి

2018లో జరిగిన అసెంబ్లీ ఎన్నికల్లో జహీరాబాద్‌ లోక్‌సభ నియోజకవర్గం పరిధిలోని ఏడు అసెంబ్లీ నియోజకవర్గాల్లో కేవలం ఎల్లారెడ్డి స్థానాన్ని మాత్రమే కాంగ్రెస్‌ గెలుపొందింది. 2019లో జరిగిన లోక్‌సభ ఎన్నికల్లో ఈ నియోజకవర్గం పరిధిలోని నాలుగు స్థానాల్లో భారాస, మూడింటిలో కాంగ్రెస్‌ ఆధిక్యం సాధించాయి. 2023 అసెంబ్లీ ఎన్నికల్లో నియోజకవర్గం పరిధిలో కాంగ్రెస్‌కు ఆధిక్యం లభించింది. త్వరలో జరుగనున్న లోకసభ ఎన్నికల్లో ఓటరు ఏ పార్టీ వైపు మొగ్గుచూపుతారో ఫలితాల అనంతరం తేలనుంది.

మండల స్థాయిలో సమావేశాలు

జహీరాబాద్‌ పార్లమెంటు నియోజకవర్గంలో 2009, 2014, 2019లలో జరిగిన ఎన్నికల్లో కాంగ్రెస్‌, భారాసల మధ్యనే పోరు సాగింది. ప్రస్తుతం త్రిముఖ పోరు నెలకొంది. భారాస, భాజపా, కాంగ్రెస్‌ పార్టీలు ఇప్పటికే మండల, నియోజకవర్గస్థాయుల్లో సమావేశాలు నిర్వహిస్తూ కార్యకర్తలను సార్వత్రిక ఎన్నికలకు సమాయత్తం చేస్తున్నాయి. నామపత్రాల దాఖలుకు మూడు పార్టీల అభ్యర్థులు కార్యాచరణ రూపొందించుకుంటున్నారు. తదనంతరం ప్రచారాన్ని హోరెత్తించేందుకు రంగం సిద్ధం చేసుకుంటున్నారు.