చౌడువాడలో పులిపంజా

దాడి సంఘటనను సబ్‌ డీఎఫ్‌ఓ ధర్మ రక్షిత్‌కు వివరిస్తున్న బాధితులు

కె.కోటపాడు, న్యూస్‌టుడే: చౌడువాడ సమీపాన గల నల్లకొండ అటవీ ప్రాంతానికి దగ్గరలో గల పాకలో సోమవారం రాత్రి పులి దెబ్బకు ఎదిరి అప్పల నర్శమ్మకు చెందిన చూడి ఆవు మృతి చెందింది. ఈ ఘటనతో చౌడువాడ, గరుగుబిల్లి, చింతపాలెం, ఆర్లి, చంద్రయ్యపేట గ్రామాల ప్రజలు భయపడిపోతున్నారు. పెద్దపులిని బంధించేందుకు తీవ్రంగా ప్రయత్నిస్తున్నామని సబ్‌ డీఎఫ్‌ఓ ధర్మ రక్షిత్‌ తెలిపారు. ఆయన మంగళవారం చౌడువాడలో పులి సంచరించిన ప్రాంతాలను పరిశీలించారు. తాము తెల్లవారుజామున ఆవుకు గడ్డి వేసేందుకు రాగా మృతి చెంది ఉందని వెంటనే గ్రామ పెద్దల ద్వారా సమాచారం అందించామని బాధిత కుటుంబ సభ్యులు సబ్‌ డీఎఫ్‌ఓ దృష్టికి తెచ్చారు. రాత్రికి సీసీ కెమెరాలను అమర్చాలని, ఇతర జాగ్రత్తలు తీసుకోవాలని ఆయన అధికారులకు సూచించారు. పులిని బంధించేందుకు బోనును ఏర్పాటు చేస్తామని, గ్రామస్థులు అన్ని జాగ్రత్తలు తీసుకోవాలన్నారు.