ఖలిస్థానీ బెదిరింపుల వేళ.. దిల్లీ ఎయిర్‌పోర్టులో సందర్శకుల ఎంట్రీపై ఆంక్షలు

దిల్లీ: ఎయిరిండియా (Air India) ప్రయాణికులను హెచ్చరిస్తూ ఖలిస్థానీ ఉగ్రవాది గుర్‌పత్వంత్‌ సింగ్‌ పన్నూ చేసిన బెదిరింపులను భారత్‌ తీవ్రంగా పరిగణిస్తోంది. ఈ క్రమంలో దిల్లీ, పంజాబ్‌ విమానాశ్రయాల్లో(airports) భద్రతను కట్టుదిట్టం చేసింది. దిల్లీ విమానాశ్రయంలో సందర్శకులకు ఎయిర్‌పోర్టు ఎంట్రీ పాస్‌ జారీని నిలిపివేయాలని బ్యూరో ఆఫ్ సివిల్ ఏవియేషన్ సెక్యూరిటీ(BCAS)ఆదేశించినట్లు సమాచారం.

బీసీఏఎస్‌ సోమవారం ఇచ్చిన ఉత్తర్వుల ప్రకారం.. ఈ రెండు విమానాశ్రయాల నుంచి ఎయిరిండియా విమానాల్లో వెళ్లే ప్రయాణికుల అదనపు తనిఖీలు ఉండనున్నాయి. అలాగే దిల్లీ విమానాశ్రయంలో సందర్శకులకు ఎంట్రీ పాస్‌ల జారీని, ఎంట్రీ టికెట్ల అమ్మకాన్ని నిషేధించనున్నారు. నవంబర్ 30 వరకు ఈ అదనపు భద్రతా ఏర్పాట్లు అమల్లో ఉండనున్నాయి. దర్యాప్తు సంస్థలను నుంచి వస్తోన్న హెచ్చరికల దృష్ట్యా ఈ ముందు జాగ్రత్త చర్యలు తీసుకున్నట్లు బీసీఏఎస్‌ పేర్కొంది. దిల్లీ విమానాశ్రయ అధికారి దీనిపై స్పందిస్తూ.. బీసీఏఎస్‌ ఉత్తర్వులు అమలవుతున్నాయన్నారు. ఈ పరిణామాల మధ్య ఎయిరిండియా నుంచి ఎలాంటి స్పందనా రాలేదు.

‘ఏం చేసినా సరే.. తక్షణమే ఆ పొగ ఆపండి’: వాయు కాలుష్యంపై సుప్రీం సీరియస్‌

భారత్‌లోని సిక్కు ప్రజలు జాగ్రత్తగా ఉండాలంటూ ఖలిస్థాన్‌ వేర్పాటువాది, ‘సిఖ్‌ ఫర్‌ జస్టిస్‌’ వ్యవస్థాపకుల్లో ఒకరైన గుర్‌పత్వంత్‌ సింగ్‌ పన్నూ కొద్దిరోజుల క్రితం ఓ వీడియో విడుదల చేయడం తీవ్ర కలకలం రేపింది. అందులో అతడు ఎయిరిండియా ప్రయాణికులకు తీవ్ర హెచ్చరికలు చేశాడు. నవంబరు 19న ఎయిరిండియా విమానంలో ప్రయాణించే వారికి ప్రమాదం పొంచి ఉందని అన్నాడు. భారత్‌లోని సిక్కులెవరూ ఆ రోజున ఎయిరిండియా(Air India) విమానాల్లో ప్రయాణించొద్దని హెచ్చరించాడు. ఇక, దిల్లీలోని ఇందిరాగాంధీ అంతర్జాతీయ విమానాశ్రయం ఆ రోజు మూతపడుతుందని, దాని పేరునూ మార్చేస్తామని వీడియోలో హెచ్చరించాడు. అదే రోజున అహ్మదాబాద్‌లో ప్రపంచ కప్‌ క్రికెట్‌ ఫైనల్‌ మ్యాచ్‌ జరగనున్న విషయాన్ని కూడా పన్నూ ప్రస్తావించాడు.

ఈ బెదిరింపులను తీవ్రంగా తీసుకున్న భారత్.. ఆ విమానాలకు భద్రత కల్పించాలని కెనడాను కోరింది. ఈ విషయమై చర్చలు జరుపుతున్నట్లు కెనడాలోని భారత హైకమిషనర్ సంజయ్ కుమార్ వర్మ వెల్లడించారు. దిల్లీ నుంచి టొరంటో, వాంకోవర్‌కు ఎయిరిండియా నేరుగా విమానాలు నడుపుతోంది.