Vande Bharat Train: ట్రాక్‌పై రాళ్లు.. వందే భారత్ లోకో పైలట్‌ అప్రమత్తతతో ప్రయాణికులకు తప్పిన ప్రమాదం

జైపుర్‌: లోకో పైలట్ల (Loco Pilot) అప్రమత్తతతో వందే భారత్‌ రైలు (Vande Bharat Train)కు పెను ప్రమాదం తప్పింది. రైలు పట్టాలపై ఇనుప రాడ్లు, రాళ్లను గుర్తించిన లోకో పైలట్లు ఎమర్జెన్సీ బ్రేకులు వేయడంతో వేలాది మంది ప్రయాణికులు తృటిలో ప్రమాదం నుంచి తప్పించుకున్నారు. రాజస్థాన్‌లోని భిల్వాడా రైల్వే స్టేషన్‌ సమీపంలో ఈ సంఘటన చోటు చేసుకుంది. సోమవారం ఉదయం 7.50 గంటలకు ఉదయ్‌పుర్‌ నుంచి జైపుర్‌కు వందే భారత్‌ రైలు బయలుదేరింది. ఉదయం 9.55 గంటల సమయంలో రైలు భిల్వాడా సమీపంలో రాగానే రైల్వే ట్రాక్‌పై రాళ్లు పేర్చి ఉండటాన్ని లోకో పైలట్లు గమనించారు. వెంటనే ఎమర్జెన్సీ బ్రేకులు వేసి రైలును నిలిపివేశారు.

కుండపోత వర్షంలో జీపీఎస్‌ను నమ్ముకొని.. ప్రాణాలు పోగొట్టుకొన్న యువ డాక్టర్లు

అనంతరం కిందకు దిగి రైలు పట్టాలను పరీక్షించగా.. రాళ్లతోపాటు ఇనుపరాడ్లు ఉండటం చూసి నిర్ఘాంతపోయారు. కొన్నిచోట్ల రాళ్లు కదలకుండా ఇనుపరాడ్లు పెట్టినట్లు గుర్తించారు. వెంటనే సంబంధిత అధికారులకు సమాచారం అందించారు. ఈ ఘటనపై రైల్వే అధికారులు దర్యాప్తు ప్రారంభించారు. ఇది ఎవరైనా ఆకతాయిలు చేసిందా? లేక దీని వెనుక ఏదైనా కుట్ర కోణం ఉందా? అనే దిశగా దర్యాప్తు చేస్తున్నట్లు రైల్వే పోలీసులు తెలిపారు. ప్రస్తుతం దీనికి సంబంధించిన వీడియో సామాజిక మాధ్యమాల్లో వైరల్‌గా మారింది.