Balakrishna: బాలకృష్ణ.. టాక్‌ షో

నందమూరి బాలకృష్ణ కొత్త ప్రయాణానికి శ్రీకారం చుట్టారు. ఓ వైపు వెండితెరపై కథానాయకుడిగా జోరు చూపిస్తూనే.. ఇప్పుడు ఓటీటీ వేదికగానూ ప్రేక్షకుల్ని అలరించేందుకు సిద్ధమయ్యారు. దీనిపై ఆదివారం ప్రముఖ ఓటీటీ వేదిక ఆహా నుంచి ఓ అధికారిక ప్రకటన వెలువడింది. బాలకృష్ణ తమ ఓటీటీ వేదిక కోసం ఓ టాక్‌ షో చేస్తున్నట్లు సదరు సంస్థ తెలియజేసింది. ఈ టాక్‌ షో తొలి ఎపిసోడ్‌ దీపావళి సందర్భంగా స్ట్రీమింగ్‌ కానున్నట్లు సమాచారం. దాదాపు పది మందికి పైగా స్టార్లతో ఈ షో తొలి సీజన్‌ను ప్లాన్‌ చేసినట్లు తెలిసింది. ఈ టాక్‌ షో కోసం ‘అన్‌ స్టాపబుల్‌’ అనే టైటిల్‌ను ఖరారు చేసినట్లు ప్రచారం వినిపిస్తోంది. ప్రస్తుతం బాలకృష్ణ నటించిన ‘అఖండ’ విడుదలకు సిద్ధమవుతుండగా.. గోపీచంద్‌ మలినేనితో చేయనున్న కొత్త చిత్రం పట్టాలెక్కేందుకు రెడీ అవుతోంది.