Sai Pallavi- Governor Dr Tamilisai: నటిపై ట్రోల్స్‌.. మండిపడ్డ తెలంగాణ గవర్నర్‌ తమిళిసై

ఇంటర్నెట్‌ డెస్క్‌: నాని, సాయిపల్లవి, కృతిశెట్టి నటించిన చిత్రం ‘శ్యామ్‌సింగ రాయ్‌’. రాహుల్‌ సాంకృత్యాన్‌ దర్శకత్వం వహించారు.  గతేడాది డిసెంబర్‌ 24న థియేటర్లలో తెలుగు, తమిళ్‌, మలయాళం, కన్నడ భాషల్లో విడుదలై  హిట్‌ టాక్‌ను సొంతం చేసుకుంది.  ఈ నెల 21 నుంచి నెట్‌ఫ్లిక్స్‌లో స్ట్రీమింగ్‌ అవుతోంది. ఓటీటీ విడుదల అనంతరం.. ఈ చిత్రంలో సాయి పల్లవి అందంగా లేదంటూ తమిళంలో ఓ వార్త ప్రచురించారు. తాజాగా ఈవిషయం గురించి తెలంగాణ గవర్నర్‌ తమిళిసై మాట్లాడారు. సాయిపల్లవిపై చేసిన వ్యాఖ్యలు బాధిస్తున్నాయన్నారు.

విషయానికొస్తే.. నటి సాయిపల్లవి ఇందులో ఓ దేవదాసి యువతి ‘మైత్రి’గా కనిపించారు. కెరీర్‌లో తొలిసారి ఓ సున్నితమైన పాత్రను పోషించినామెకు మంచి మార్కులు పడ్డాయి. ప్రణవాలయ పాటలో ఆమె చేసిన నృత్యం ప్రేక్షకులను కట్టిపడేసింది. ఇలా ఓ పక్క ప్రశంసలు వెల్లువెత్తుతుంటే.. తమిళనాట దేవదాసి పాత్రలో నటించిన సాయిపల్లవి అందంగా లేదంటూ ఓ వార్త ప్రచురితమైంది. దీనిపై పెద్ద ఎత్తున వ్యతిరేకంగా నిరసన వ్యక్తమైంది. తెలంగాణ గవర్నర్‌ తమిళిసై సాయిపల్లవిపై వచ్చిన వార్తలు బాధించాయంటూ ట్విటర్‌లో పోస్ట్‌ చేశారు.

ఓ తమిళ ఛానెల్‌కు ఇచ్చిన ఇంటర్వ్యూలో గవర్నర్‌ తమిళిసై మాట్లాడుతూ... ‘‘ సాయిపల్లవి గురించి బాడీ షేమింగ్ చేయడం నన్ను తీవ్రంగా బాధించింది. గతంలో నా రూపాన్ని ఎప్పుడూ ట్రోల్‌ చేసేవారు. అలాంటి మాటలు పడ్డవారికే ఆ బాధంటే ఏమిటో తెలుస్తుంది.. ఆ విషయంలో తీవ్రంగా బాధపడ్డా. కానీ నా ప్రతిభతో, నా శ్రమతో ఆ మాటలను ఎదుర్కొన్నా.అలాంటి కామెంట్స్‌ బారిన పడకుండా ఉండటానికి మనమేమీ మహాత్ములం కాదు. అయితే నాపై చేసిన కామెంట్స్‌ని పట్టించుకోలేదు.కానీ ఆ ట్రోలింగ్ బాధిస్తుందా అని అడిగితే.. కచ్చితంగా ‘ఔను’ అనే చెబుతాను” అన్నారు.

అలా పుట్టడం మన తప్పు కాదు..

పొట్టిగా.. డార్క్‌ స్కిన్‌తో, నాలాంటి (రింగుల) జుట్టుతో పుట్టడం మన తప్పు కాదు. వీటన్నింటిలోనూ అందం ఉంది. అందుకే ఓ సామెత ఉంది ‘‘ కాకి పిల్ల కాకికి ముద్దు అని’’. కాకి తన పిల్లను బంగారు పిల్లగా భావిస్తుంది. అంతేకానీ నల్లగా ఉందని వదిలిపెట్టదు కదా! స్త్రీలు ఎక్కువగా బాడీ షేమింగ్‏కు గురవుతారు. కానీ పురుషులు అలాంటి మాటలు ఎదుర్కోలేరు. 50 ఏళ్ల వయసులో ఉన్న పురుషులను యువకులుగా చూస్తారు.కానీ స్త్రీలు అలా కాదు. మహిళల ఎదుగుదలకు అడ్డుపడుతున్న ఈ సమాజం... వారిని బాధపెట్టడం ద్వారా వారి ఎదుగుదలను తగ్గించడానికి ప్రయత్నిస్తోంది’’ అని అభిప్రాయాన్ని వ్యక్తం చేశారు.