Sardar: సినిమా హిట్‌.. డైరెక్టర్‌కు కారు గిఫ్ట్‌...

హైదరాబాద్‌: తమిళ హీరో అయినా అన్ని భాషల్లో సినీ ప్రియులకు సుపరిచితమైన నటుడు కార్తి(Karthi). ఈ ఏడాది ఈ యంగ్‌ హీరో వరుస విజయాలు అందుకుంటూ ఖుషీ అవుతున్నాడు. ఇటీవల విడుదలైన సర్దార్‌(Sardar) సినిమా కార్తి కెరీర్‌లోనే బిగ్గెస్ట్‌ హిట్‌లలో ఒకటిగా నిలిచింది. స్పై థ్రిల్లర్‌గా ప్రేక్షకుల ముందుకు వచ్చిన ఈ సినిమా అద్భుతమైన విజయాన్ని అందుకుని నిర్మాతకు లాభాల పంట పండించింది. దీంతో ఈ సినిమా నిర్మాత ఎస్‌ లక్ష్మణ్‌ కుమార్‌ దర్శకుడు పిఎస్ మిత్రన్‌కు కారును బహుమతిగా ఇచ్చి తన ఆనందాన్ని వ్యక్తం చేశారు. కారు తాళాన్ని కార్తి చేతుల మీదుగా డైరెక్టర్‌కు అందించారు. ప్రస్తుతం ఈ ఫొటోలు నెట్టింట హల్‌చల్‌ చేస్తున్నాయి.

ఇక దీపావళి కానుకగా థియేటర్లలో సందడి చేసిన ఈ సినిమాకు సీక్వెల్‌ను కూడా ప్రకటించింది చిత్రబృందం. దానికి సర్దార్‌2(Sardar 2) గా టైటిల్‌ను ఖరారు చేసిన విషయం తెలిసిందే. ‘సర్దార్‌’కి పని చేసిన బృందమే ఈ రెండో పార్ట్‌లోనూ భాగం కానుందని స్పష్టత ఇచ్చారు. ‘‘ఒక్కసారి గూఢచారి అయితే.. ఎప్పుడూ గూఢచారియే’’ అంటూ సర్దార్‌ కొడుకు పాత్ర రా ఏజెంట్‌గా ఎంపికవ్వడాన్ని ప్రచార చిత్రంలో చూపించారు. కార్తి సరసన రాశిఖన్నా నటించిన ఈ సినిమాలో చుంకీ పాండే, రజిషా విజయన్, లైలా, మునిష్కాంత్, అశ్విన్ కీలకపాత్రలు పోషించారు.