ఓటీటీలో ఈషా దేవోల్‌

అజయ్‌దేవగణ్‌కు జోడిగా ‘రుద్ర’లో..

ముంబయి: ఆరేళ్ల విరామం తర్వాత మళ్లీ సందడి చేయనుంది నటి ఈషా దేవోల్‌. డిస్నీహాట్‌స్టార్‌ వేదికగా ‘రుద్ర’-ది ఎడ్జ్‌ ఆఫ్‌ డార్క్‌నెస్ అనే వెబ్‌సిరీస్‌లో తొలి సారి ఓటీటీలో ప్రేక్షకులను పలకరించనుంది. ఈ చిత్రాన్ని అప్లాజ్‌ ఎంటర్‌టైన్‌మెంట్స్‌ బీబీసీ ఇండియాతో సంయుక్తంగా నిర్మిస్తోంది. క్రైమ్‌, డ్రామా నేపథ్యంలో సాగే ఈ వెబ్‌సిరీస్‌లో బాలీవుడ్‌ నటుడు అజయ్‌దేవగణ్‌కు జోడిగా నటించనుంది ఈషా.

ఈ సందర్భంగా ఈషా మాట్లాడుతూ.. ‘‘బీబీసీతో పాటు అప్లాజ్‌ ఎంటర్‌టైన్‌మెంట్స్‌తో కలిసి పనిచేయడం సంతోషంగా ఉంది. నటిగా నేనెప్పుడూ కొత్త కథలు ఎంచుకోవడానికే ఇష్టపడతా. ఫ్రెష్‌ లుక్‌తో పోలీసు డ్రామా నేపథ్యంలో గతంలో ఎన్నడూ రాని విధంగా ఈ సిరీస్‌ ఉండబోతుంది. ఓటీటీలో అలరించేందుకు సర్వం సిద్ధంగా ఉన్నా. పదేళ్ల తర్వాత అజయ్‌దేవగణ్ తో కలిసి నటిస్తున్నా. ఆయనో అద్భుత నటుడు. రుద్ర చిత్రంలో అజయ్‌తో కలిసి నటించేందుకు ఎదురుచూస్తున్నా’’ అని ఆనందాన్ని పంచుకుంది ఇషా.