నీవల్లే ప్రేమంటే ఏంటో తెలిసింది: బన్నీ

సోషల్‌మీడియాలో అల్లుఅర్జున్‌ పోస్ట్‌...!

హైదరాబాద్‌: ఒకరి వల్ల తనకి ప్రేమంటే ఏమిటో తెలిసిందని టాలీవుడ్‌ స్టైలిష్‌ స్టార్‌ అల్లు అర్జున్‌ అన్నారు. కొన్ని సంవత్సరాలపాటు ప్రేమలో ఉన్న అల్లు అర్జున్‌, స్నేహారెడ్డి 2011లో వివాహబంధంతో ఒక్కటయ్యారు. ఈ దంపతులకు అయాన్‌, అర్హ జన్మించిన విషయం విధితమే. అయితే శుక్రవారం అయాన్‌ 6వ పుట్టినరోజు సందర్భంగా అల్లు అర్జున్‌ ఇన్‌స్టా వేదికగా ఓ ఎమోషనల్‌ పోస్ట్‌ పెట్టారు. ‘‘ప్రేమంటే ఏమిటి?’ అనే విషయం గురించి నేను ఎప్పుడూ ఆలోచించేవాడిని. గతంలో నేను గొప్ప ఫీలింగ్స్‌ను చవిచూశాను.. ఆ ఫీల్సింగ్స్‌ ప్రేమో కాదో నాకు కచ్చితంగా తెలియదు. కానీ నువ్వు నా జీవితంలోకి వచ్చాక నాకు ప్రేమంటే ఏమిటో తెలిసింది. నువ్వే ప్రేమ. ఐ లవ్‌ యూ అయాన్‌. హ్యాపీ బర్త్‌డే మై బేబీ’ అని బన్నీ పోస్ట్‌ పెట్టారు.

ఈ ఏడాది విడుదలైన ‘అల.. వైకుంఠపురములో..’ చిత్రంలో అల్లు అర్జున్‌ నటించారు. త్రివిక్రమ్‌ శ్రీనివాస్‌ దర్శకత్వం వహించిన ఈ సినిమాలో బన్నీ సరసన పూజాహెగ్డే సందడి చేశారు. ప్రస్తుతం సుకుమార్‌ దర్శకత్వంలో తెరకెక్కుతోన్న ఓ సినిమాలో అల్లు అర్జున్‌ నటిస్తున్నారు. ఈ సినిమాలో అల్లు అర్జున్‌ లారీడ్రైవర్‌గా విభిన్నమైన పాత్రలో కనిపించనున్నట్లు సమాచారం. ఈ సినిమా కోసం రష్మిక-బన్నీ మొదటిసారి కలిసి పనిచేయనున్నారు. దేవిశ్రీ ప్రసాద్‌ స్వరాలు అందించనున్నారు.