Hanuman: ‘హనుమాన్‌’ మరో రికార్డు.. ఆనందంతో దర్శకుడి పోస్ట్‌

ఇంటర్నెట్‌ డెస్క్‌: తేజ సజ్జా (Teja Sajja) ప్రధాన పాత్రలో ప్రశాంత్‌ వర్మ తెరకెక్కించిన చిత్రం ‘హనుమాన్‌’ (HanuMan). సూపర్‌ హిట్‌ టాక్‌ను సొంతం చేసుకున్న ఈ చిత్రం కాసుల వర్షం కురిపిస్తోంది. తాజాగా సరికొత్త మైలురాయిని చేరుకుంది. విడుదలైన 25 రోజుల్లో రూ.300కోట్లు వసూళ్లు చేసింది. దీంతో ఈ ఏడాదిలో రూ.300 కోట్లు సాధించిన మొదటి సినిమాగా రికార్డును నెలకొల్పింది (HanuMan Movie Collectons). దీనిపై దర్శకుడు ప్రశాంత్‌ వర్మ పోస్ట్‌ పెట్టారు. ‘‘హనుమాన్‌’ను ఆదరిస్తోన్న ప్రేక్షకులకు ధన్యవాదాలు ఎలా చెప్పాలో అర్థం కావట్లేదు. ఈ చిత్రానికి ఎంతోమంది వారి హృదయాల్లో స్థానం కల్పించారు. ఒక్కసారి కంటే ఎక్కువ సార్లు దీన్ని వీక్షిస్తున్నారు. ఈ చిత్రాన్ని ఆదరిస్తోన్న అందరికీ కృతజ్ఞతలు’ అని రాసుకొచ్చారు. దీంతో నెటిజన్లు కూడా శుభాకాంక్షలు చెబుతున్నారు.

బాలీవుడ్‌లో చర్చనీయాంశమైన సందీప్ వంగా కామెంట్స్.. స్పందిస్తోన్న ప్రముఖులు

జనవరి 12 విడుదలైన ఈ చిత్రం అద్భుతమైన విజయాన్ని అందుకుంది. దీంతో ‘సంక్రాంతి సీజన్‌లో రిలీజైన సినిమాల జాబితా’లో.. అత్యధిక వసూళ్లు సాధించిన చిత్రాల్లో నంబరు 1గా నిలిచింది. 92 ఏళ్ల టాలీవుడ్‌ ప్రస్థానంలో ఆల్‌టైమ్‌ సంక్రాంతి బ్లాక్‌బస్టర్‌గా నిలిచింది. ఈ చిత్రానికి సీక్వెల్‌గా ‘జై హనుమాన్‌’ రానుంది. కొన్ని రోజుల క్రితమే ప్రీ ప్రొడక్షన్‌ పనులు ప్రారంభమయ్యాయి. ఈ సినిమాలోని ప్రధాన పాత్ర కోసం బాలీవుడ్‌ స్టార్‌ హీరోను తీసుకునే ఆలోచనలో ఉన్నారు దర్శకుడు. ‘‘ఆన్‌స్క్రీన్‌తో పాటు, ఆఫ్‌ స్క్రీన్‌లోనూ వారి ఇమేజ్‌ సరిపోవాలి. చూడగానే భక్తితో నమస్కారం చేయాలన్న భావన కలగాలి. ఆ జాబితాలో చిరంజీవి సర్‌ కూడా ఉండొచ్చు’’ అని ఓ ఇంటర్వ్యూలో ప్రశాంత్‌ వర్మ అభిప్రాయం వ్యక్తం చేశారు. దీంతో ఈ సీక్వెల్‌పై కూడా భారీ అంచనాలు నెలకొన్నాయి.