Kannappa: మంచు విష్ణు బర్త్‌డే స్పెషల్‌.. ఆకట్టుకుంటున్న ‘కన్నప్ప’ ఫస్ట్‌లుక్‌..

ఇంటర్నెట్‌ డెస్క్‌: నటుడు మంచు విష్ణు (Manchu Vishnu) కలల ప్రాజెక్ట్‌గా సిద్ధమవుతోన్న చిత్రం ‘కన్నప్ప’ (Kannappa). భారీ తారాగణంతో ఇది తెరకెక్కుతోంది. ‘మహాభారత’ సిరీస్‌ని రూపొందించిన ముఖేష్‌ కుమార్‌ సింగ్‌ దీనికి దర్శకత్వం వహిస్తున్నారు. నేడు విష్ణు పుట్టినరోజు సందర్భంగా మూవీ టీమ్‌ ఈ సినిమా ఫస్ట్‌లుక్‌ను విడుదల చేసింది. ప్రస్తుతం ఈ లుక్‌ నెటిజన్లను ఆకట్టుకుంటోంది.

‘యానిమల్‌’ రన్‌ టైమ్‌ ఇదే..! ఇటీవల కాలంలో ఇదే అతి పెద్ద సినిమా!

హీరో ముఖం కనిపించకుండా శివలింగం వైపు ఓ యోధుడు విల్లు ఎక్కుపెట్టినట్లు ఈ పోస్టర్‌లో చూపించారు. దీన్ని షేర్‌ చేసిన మంచు విష్ణు ‘కన్నప్ప’ ప్రపంచంలోకి అడుగుపెట్టండి అంటూ క్యాప్షన్‌ జోడించారు. ఒక నాస్తికుడైన యోధుడు శివుడికి పరమభక్తుడిగా ఎలా మారాడన్నది ఈ చిత్రంలో చూపించనున్నట్లు ఆయన తెలిపారు. పాన్‌ ఇండియా స్థాయిలో రూపొందుతోన్న ఈ సినిమా పోస్టర్‌ను ఆరు భాషల్లో విడుదల చేశారు. విష్ణు ప్రధానపాత్రలో కనిపించనున్న ఈ చిత్రంలో ప్రభాస్‌ శివుడిగా, నయనతార పార్వతిగా నటిస్తున్నట్లు తెలుస్తోంది. అలాగే స్టార్‌ హీరోలు శివరాజ్‌కుమార్‌, మోహన్‌లాల్‌, శరత్‌ కుమార్‌, మోహన్‌బాబు కీలకపాత్రల్లో కనిపించనున్నారు. ఈ చిత్రం కోసం హాలీవుడ్‌ స్టంట్‌ మాస్టర్‌లు పనిచేయనున్నారు. ఇక న్యూజిల్యాండ్‌లో ఒకే షెడ్యూల్‌లో ‘కన్నప్ప’ చిత్రీకరణ పూర్తి చేయనున్నారు. ఇటీవలే దీని షూటింగ్‌ ప్రారంభమైంది. ఈ చిత్రాన్ని మోహన్‌బాబు నిర్మిస్తున్నారు.