Megha Akash: న్యాయం చేస్తానో.. లేదో అని భయపడ్డా!

‘‘ఊహలకందని కథనంతో.. ఆద్యంతం ఉత్కంఠత రేకెత్తిస్తూ సాగే చిత్రం ‘రావణాసుర’ (Ravanasura). కచ్చితంగా అందరికీ నచ్చుతుంది’’ అంది నటి మేఘా ఆకాష్‌ (Megha Akash). రవితేజ (Raviteja) హీరోగా సుధీర్‌ వర్మ తెరకెక్కించిన చిత్రమిది. మేఘ ఓ నాయికగా నటించింది. హీరో సుశాంత్‌ కీలక పాత్ర పోషించారు. తాజా ఈ సినిమా ప్రేక్షకుల ముందుకు వచ్చిన నేపథ్యంలో మేఘా పంచుకున్న విశేషాలు...

* ‘‘ఏడాది క్రితం సుధీర్‌ వర్మ నాకీ కథ వినిపించారు. అప్పుడే నాకు చాలా నచ్చేసింది. ‘హీరోలెవరు లేరు’ అనే పాయింట్‌ చాలా ఆసక్తిరేకెత్తించింది. రవితేజ వంటి ఓ అగ్ర హీరో ఇలాంటి కథలో నటిస్తుండటం ఇంకా బాగా నచ్చింది. అందుకే ఈ చిత్రం ఎట్టి పరిస్థితుల్లో వదులుకోకూడదని నిర్ణయించుకున్నా. కాకపోతే ఈ నిర్ణయం తీసుకోవడానికి నాకు రెండు రోజుల సమయం పట్టింది. ఎందుకంటే ఇందులో నా పాత్ర చాలా వైవిధ్యంగా.. సవాల్‌తో నిండి ఉంటుంది. పూర్తిగా న్యాయం చేయగలనో.. లేదో అని భయపడ్డా. కానీ, ఇలాంటి సవాల్‌తో కూడిన పాత్రలు చేసినప్పుడే నాలోని అత్యుత్తమ నటిని బయటకు తీసుకురాగలుగుతా అనిపించి ఓకే చెప్పా’’.

* ‘‘నటిగా నా ప్రయాణం పట్ల.. ఇప్పటి వరకు నాకు దక్కిన గుర్తింపు పట్ల సంతృప్తితో ఉన్నా. అతిగా ఆశించడం నాకు నచ్చదు. కుటుంబానికి చాలా ప్రాధాన్యమిస్తా. అందుకే ఒకేసారి మూడు నాలుగు చిత్రాలు చేసేయాలని అనుకోను. ఏమాత్రం విరామం దొరికినా ఇంట్లో వాళ్లతో కలిసి గడపటానికే ఇష్టపడతా. నా సినిమాల్ని నేనెప్పుడూ ఒక్కసారే చూసుకుంటా. అదీ ఓ మామూలు ప్రేక్షకుడిలాగే చూసి ఆస్వాదిస్తా. అంతే తప్ప ప్రతి చిత్రాన్నీ విమర్శనాత్మక కోణం నుంచి చూస్తూ ఏదొకటి నేర్చేసుకోవాలనైతే అనుకోను. సెట్లో నేనెప్పుడూ మానిటర్‌ చూడను. ‘బాగా చేశానా.. లేదా?’ అని దర్శకుడ్నే అడిగి తెలుసుకుంటా. వాళ్ల నిర్ణయాలకు అనుగుణంగానే నటిస్తూ వెళ్తా’’.

* ‘‘నేను ఇష్టపడే వాతావరణంలో నాకు నచ్చిన పాత్రలతో ప్రయాణించడాన్ని ఆస్వాదిస్తా. తెలుగులో నాకు అందరు హీరోలతో కలిసి పని చేయాలని ఉంది. ముఖ్యంగా పవన్‌ కల్యాణ్‌తో కలిసి చేయాలన్నది కల. ప్రస్తుతం తమిళంలో విజయ్‌ ఆంటోనితో ఓ సినిమా చేస్తున్నా. పీపుల్‌ మీడియా ఫ్యాక్టరీ సంస్థలో సంతానంతో కలిసి ఓ చిత్రం చేస్తున్నా. తెలుగులో మరో సినిమా చిత్రీకరణ దశలో ఉంది. ఇంకొన్ని చర్చల దశలో ఉన్నాయి’’.

* ‘‘బోలెడన్ని ట్విస్ట్‌లు, షాక్‌లతో నిండిన సినిమా ఇది. ఇందులోని ప్రతి అంశం మిమ్మల్ని సర్‌ప్రైజ్‌ చేస్తుంది. ఊహలకు అందని రీతిలో సాగుతుంది. ఇందులో నా పాత్ర పేరు హారిక. బాగా డబ్బున్న అమ్మాయిని. క్లాస్‌గా కనిపిస్తా. నేనిప్పటి వరకు చేసిన పాత్రలకు పూర్తి భిన్నంగా..  కొత్తగా ఉంటుంది. వినోదం పంచుతూనే భావోద్వేగభరితంగానూ కనిపిస్తుంది. నటనకు ఆస్కారమున్న పాత్రిది’’.