Naga babu: ఆ మేధావులకు ఇదే సమాధానం.. సినీ విమర్శకులపై నాగబాబు స్ట్రాంగ్‌ కౌంటర్‌

హైదరాబాద్‌: సినీ విమర్శకులపై నటుడు, నిర్మాత నాగబాబు(Naga babu) ఘాటుగా స్పందించారు. ఈ మేరకు వారిని ఉద్దేశిస్తూ తన సోషల్‌మీడియా ఖాతాలో వరస ట్వీట్లు చేశారు. సినిమాల వల్ల ప్రేక్షకులకు నష్టం కలుగుతుందని, సమాజంలో చెడు పెరగడానికి సినిమాలే కారణమని విమర్శించే(movie critics) వారికి తన ట్వీట్లతో సమాధానం చెప్పారు.

‘‘సినిమాల్లో చూపించే హింస వల్ల జనాలు చెడిపోతారు అనుకుంటే.. మరి సినిమాల్లో చూపించే మంచి వల్ల జనాలు బాగుపడాలి కదా. సినిమాలు కేవలం వినోదం కోసమే కానీ, జనాన్ని బాగు చెయ్యడం కోసమో చెడగొట్టడానికో కాదు. అలా సినిమాలు తీసేంత గొప్పవాళ్లు లేరిక్కడ. నేను ఓ నిర్మాతగా చెబుతున్నాను.. ఇది కేవలం ఒక వ్యాపారం మాత్రమే. సినిమాల వల్ల జనాలు చెడిపోతున్నారు అని ఏడ్చే కుహనా మేధావులకు ఇది నా సమాధానం. సినిమాల్లో ఏదైనా అతిగా ఉంటే దానికి సెన్సార్‌ (censor) ఉంది. కుహనా మేధావుల్లారా మీరు ఏడవకండి’’ అని ట్వీట్‌ చేశారు.

ఈ ట్వీట్లు నెట్టింట వైరల్‌ అవుతున్నాయి. సినీ ప్రియులు నాగబాబుకు మద్దతుగా కామెంట్స్‌ చేస్తున్నారు. ఇక ఆయన నిర్మాతగా రుద్రవీణ, బావగారు బాగున్నారా, గుడుంబా శంకర్‌, ఆరెంజ్‌ వంటి సినిమాలు నిర్మించిన విషయం తెలిసిందే. ప్రస్తుతం నాగబాబు సినిమాల్లో నటిస్తూనే రాజకీయాల్లోనూ చురుకుగా పాల్గొంటున్నారు.