Ram Gopal Varma: ‘హనుమాన్‌’తో ప్రశాంత్‌ వర్మ ఇండస్ట్రీకి పాఠాన్ని నేర్పాడు: రామ్‌ గోపాల్‌ వర్మ

ఇంటర్నెట్‌డెస్క్‌: ‘హనుమాన్‌’ దర్శకుడు ప్రశాంత్‌ వర్మను ప్రశంసలతో ముంచెత్తారు రామ్‌ గోపాల్ వర్మ. పాన్‌ ఇండియా స్థాయిలో విడుదలైన ఈ చిత్రం విజయాన్ని సొంతం చేసుకుంది. దీంతో ఈ దర్శకుడి పేరు దేశవ్యాప్తంగా మారుమోగుతోంది. తాజాగా ఆయన తెలివితేటలను మెచ్చుకుంటూ రామ్ గోపాల్ వర్మ ఓ ప్రత్యేక వీడియో పోస్ట్‌ చేశారు.

‘‘తక్కువ బడ్జెట్‌తో కూడా అద్భుతమైన వీఎఫ్‌ఎక్స్‌ చిత్రాలను తెరకెక్కించొచ్చని ప్రశాంత్‌ వర్మ నిరూపించాడు. ఇలాంటి సినిమాలు తీయాలంటే వందల కోట్లు కావాలని భావించే వారికి చెంపదెబ్బలా దీన్ని తీసుకువచ్చారు. ఈ చిత్రంతో ఇండస్ట్రీకి గొప్ప పాఠాన్ని నేర్పాడు. పరిమిత బడ్జెట్‌లో ఇంత అద్భుతమైన సినిమాను తీయాలంటే చాలా తెలివి ఉండాలి. సమగ్రత, పట్టుదల, నిరంతర శ్రమ ఉంటేనే ఇది సాధ్యమవుతుంది. ఈ సినిమా విజయం సాధించినందుకు మాత్రమే కాదు.. ఎంతోమందికి మంచి పాఠాన్ని నేర్పినందుకు నేను ప్రశాంత్‌ను అభినందించాలనుకుంటున్నా. ఇండస్ట్రీ మొత్తం తరఫున నేను ధన్యవాదాలు చెబుతున్నాను’’ అని ప్రశంసించారు.

ఈ చిత్ర విజయంపై హీరో తేజ సజ్జా ఆనందం వ్యక్తం చేశారు. ఆరంభంలో కొన్ని ఇబ్బందులు ఎదురయ్యాయని వాటిని దాటేందుకు దైవశక్తే తోడుందన్నారు. హనుమంతుడు సముద్రం దాటినట్లు ఈ చిత్రం కూడా అన్ని అడ్డంకులు దాటుకొని థియేటర్లలోకి వచ్చిందని చెప్పారు. తన కెరీర్‌లో ఇది మైలురాయి లాంటి సినిమా అని పేర్కొన్నారు.