Rashmika: రష్మిక మార్ఫింగ్‌ వీడియో వైరల్‌.. తీవ్రంగా స్పందించిన కేంద్ర ఐటీ శాఖ

ఇంటర్నెట్‌ డెస్క్‌: ఇండస్ట్రీలో అత్యధికంగా ఫ్యాన్‌ ఫాలోయింగ్‌ ఉన్న హీరోయిన్లలో రష్మిక (Rashmika) ఒకరు. ఈ అమ్మడుకు సోషల్‌మీడియాలోనూ లక్షల్లో ఫాలోవర్స్‌ ఉన్నారు. అందుకే ఆమెకు సంబంధించిన ఏ చిన్న ఫొటో అయినా క్షణాల్లో వైరల్‌గా మారుతుంది. తాజాగా రష్మికకు సంబంధించిన ఓ ఫేక్‌ వీడియో సోషల్‌ మీడియాలో చక్కర్లు కొడుతోంది. దీనిపై కేంద్ర ఐటీ శాఖ తీవ్రంగా స్పందించింది. ఇలాంటి మార్ఫింగ్‌ వీడియోల కట్టడి సామాజిక మాధ్యమాల బాధ్యతే అని స్పష్టం చేసింది.

రష్మిక డీప్‌నెక్ బ్లాక్‌ డ్రెస్‌ వేసుకుని లిఫ్ట్‌లో ఉన్నట్లు ఈ మార్ఫింగ్‌ వీడియోను రూపొందించారు. ఇది చూసిన నెటిజన్లు.. ఇలా మార్ఫింగ్‌ చేయడం నేరమని అంటున్నారు. దీనికి సంబంధించిన ఒరిజినల్ వీడియోను ఓ జర్నలిస్ట్‌ పోస్ట్ చేసి క్లారిటీ ఇచ్చారు. ఆ వీడియోలో ఉన్నది జారా పటేల్ అనే యువతి అని.. రష్మిక కాదని స్పష్టం చేశారు. ఇలాంటి తప్పుడు చర్యలను అరికట్టేందుకు చట్టపరంగా ఓ ఫ్రేమ్‌వర్క్‌ను తీసుకురావాల్సిన అవసరం ఉందని కేంద్ర ప్రభుత్వం దృష్టికి తీసుకెళ్లారు. 

ఇది అత్యంత ప్రమాదకరమైన చర్య : కేంద్ర ఐటీ శాఖ

రష్మిక మార్ఫింగ్‌ వీడియో వివాదంపై కేంద్ర ఐటీ శాఖ సహాయ మంత్రి రాజీవ్‌ చంద్రశేఖర్‌ తాజాగా ఎక్స్‌ వేదికగా స్పందించారు. ‘‘ఇంటర్నెట్‌ను వినియోగించే డిజిటల్‌ పౌరులకు భద్రత కల్పించేందుకు ప్రధాని మోదీ ప్రభుత్వం కట్టుబడి ఉంది. ఈ ఏడాది ఏప్రిల్‌లో జారీ చేసిన ఐటీ నిబంధల ప్రకారం.. సామాజిక మాధ్యమ వేదికలు కొన్ని చట్టపరమైన బాధ్యతలను పాటించాల్సి ఉంటుంది. దీని ప్రకారం.. తమ మాధ్యమాల్లో ఏ యూజర్‌ కూడా నకిలీ/తప్పుడు సమాచారాన్ని పోస్ట్‌ చేయకుండా చూసుకోవాలి. ఒకవేళ అలాంటి ఫేక్‌ సమాచారాన్ని గుర్తిస్తే.. దాన్ని 36 గంటల్లోగా తొలగించాలి. ఈ నిబంధనలను పాటించకపోతే రూల్‌ 7 కింద.. ఆ సామాజిక మాధ్యమాలను కోర్టుకు లాగొచ్చు. మార్ఫింగ్‌ అనేది అత్యంత ప్రమాదకరమైన చర్య. ఈ సమస్యను సామాజిక మాధ్యమాలే పరిష్కరించాలి’’ అని రాజీవ్‌ చంద్రశేఖర్‌ రాసుకొచ్చారు.

అమితాబ్‌ ఆగ్రహం..

ఈ వీడియోపై రష్మిక అభిమానులతోపాటు పలువురు సినీ ప్రముఖులు ఆగ్రహం వ్యక్తం చేస్తున్నారు. దీనిపై బాలీవుడ్‌ హీరో అమితాబ్‌ బచ్చన్ కూడా స్పందించారు. దీన్ని క్రియేట్ చేసిన వారిని కఠినంగా శిక్షించాలని డిమాండ్‌ చేశారు. 

ఈ దీపావళికి థియేటర్‌ దద్దరిల్లే చిత్రాలు.. మరి ఓటీటీలో..!

ప్రస్తుతం రష్మిక టాలీవుడ్‌తో పాటు బాలీవుడ్‌లోనూ వరుస సినిమాలు చేస్తున్నారు. రణ్‌బీర్‌ సరసన ఆమె నటించిన ‘యానిమల్‌’ (Animal) డిసెంబర్‌ 1న ప్రపంచవ్యాప్తంగా విడుదల కానుంది. అలాగే అల్లు అర్జున్ - సుకుమార్‌ల పాన్ ఇండియా సినిమా ‘పుష్ప-2’లోనూ (Pushpa-2) నటిస్తోన్నారు. ఇవి కాకుండా మరో మూడు పెద్ద ప్రాజెక్ట్‌ల్లో అవకాశాలను సొంతం చేసుకున్నారు.