Animal: ‘యానిమల్‌’ సీక్వెల్‌.. ప్రారంభం అప్పుడే..?

ఇంటర్‌నెట్‌ డెస్క్‌: టాలీవుడ్‌ డైరెక్టర్‌ సందీప్‌రెడ్డి వంగా (Sandeep Reddy Vanga)- బాలీవుడ్‌ హీరో రణ్‌బీర్‌ కపూర్‌(Ranbir Kapoor) కాంబినేషన్‌లో తెరకెక్కిన హిట్‌ చిత్రం ‘యానిమల్‌’ (Animal). దానికి సీక్వెల్ ‘యానిమల్‌ పార్క్‌’ ఉంటుందని ప్రకటించిన విషయం తెలిసిందే. ఆ పార్ట్‌ 2 (Animal Park) 2025లో సెట్స్‌పైకి వెళ్లనుందని, ఈ ఫిబ్రవరిలో స్క్రిప్ట్‌ వర్క్‌ మొదలు కానుందని సమాచారం. దీనిపై అధికారిక ప్రకటన వెలువడలేదు. ప్రభాస్‌ హీరోగా సందీప్‌ ఇప్పటికే ‘స్పిరిట్‌’ చిత్రాన్ని ఖరారు చేశారు. దాన్ని తెరకెక్కించేందుకు సిద్ధమవుతున్నారు. మరోవైపు, రణ్‌బీర్‌ వేరే ప్రాజెక్టులతో బిజీగా ఉన్నారు. దాంతో, వచ్చే ఏడాదే ‘యానిమల్‌ పార్క్‌’ ప్రారంభమవుతుందని తెలుస్తోంది.

ఓ ఇంటర్వ్యూలో సందీప్‌ సీక్వెల్‌పై మాట్లాడుతూ.. ‘‘ఇందులో మరిన్ని బలమైన పాత్రలు ఉంటాయి. అలాగే గతంలో వచ్చిన సినిమాల కంటే ఎక్కువ థ్రిల్‌ను పంచడమే ‘యానిమల్‌ పార్క్‌’ లక్ష్యం. ఊహించనన్ని యాక్షన్‌ సన్నివేశాలుంటాయి. రణ్‌బీర్‌ కపూర్ పాత్ర మరింత క్రూరంగా ఉంటుంది’’ అని తెలిపారు.

తండ్రి, కొడుకుల అనుబంధం నేపథ్యంలో రూపొందిన ‘యానిమల్‌’ బాక్సాఫీసు వద్ద మంచి వసూళ్లు రాబట్టింది. ఓటీటీ ‘నెట్‌ఫ్లిక్స్‌’లోనూ వ్యూస్‌ విషయంలో టాప్‌లో నిలిచింది. రణ్‌బీర్‌తోపాటు రష్మిక, త్రిప్తి దిమ్రి, అనిల్‌ కపూర్‌, బాబీ దేవోల్‌, పృథ్వీరాజ్‌ తమ నటనతో ప్రేక్షకులను విశేషంగా ఆకట్టుకున్నారు.