Rajendra Prasad: ఓటీటీ బాటలో రాజేంద్ర ప్రసాద్.. ఆసక్తి పెంచుతున్న టైటిల్‌!

ఇంటర్నెట్‌ డెస్క్: కరోనా వైరస్‌/లాక్‌డౌన్‌ తర్వాత ఓటీటీకి ప్రపంచవ్యాప్తంగా ఆదరణ పెరిగింది. అందుకే కొత్తవారితో పాటు అనుభవం ఉన్న నటులూ డిజిటల్‌ మాధ్యమం వైపు అడుగులు వేస్తున్నారు. ఇప్పటికే పలువురు సీనియర్‌ నటులు ఓటీటీ చిత్రాలు, వెబ్‌ సిరీస్‌ల్లో కనిపించి మెప్పించారు. ఇప్పుడా జాబితాలోకి రాజేంద్ర ప్రసాద్‌ చేరనున్నారు. రాజేంద్ర ప్రసాద్‌ ప్రధాన పాత్రలో దర్శకుడు పవన్‌ సాధినేని ఓటీటీ ఫిల్మ్‌ను తెరకెక్కిస్తున్నారు. ఈ చిత్ర టైటిల్‌ మోషన్‌ పోస్టర్‌ను ఆదివారం విడుదల చేశారు. ఈ సినిమాకి ‘సేనాపతి’ అనే టైటిల్‌ ఖరారైంది. సంబంధిత వీడియోలో.. రాజేంద్ర ప్రసాద్‌ ఓ బాలుడికి చెప్పిన ‘ఏడు చేపల కథ’ సినిమాపై ఆసక్తిని పెంచేలా ఉంది. ఈ సినిమాని విష్ణు ప్రసాద్‌, సుస్మిత కొణిదెల నిర్మిస్తున్నారు. శ్రవణ్‌ భరద్వాజ్‌ సంగీతం అందిస్తున్నారు. ఈ చిత్రం తెలుగు ఓటీటీ ‘ఆహా’లో విడుదలకానుంది. రాజేంద్ర ప్రసాద్‌ ఈ ఏడాది ‘గాలి సంపత్‌’, ‘క్లైమాక్స్‌’, ‘గల్లీరౌడీ’, ‘పెళ్లి సందD’ తదితర చిత్రాలతో ప్రేక్షకులకు వినోదం పంచారు.

► Read latest Cinema News and Telugu News