Vijay Devarakonda: మొన్న విజయ్‌-రష్మిక.. నిన్న విజయ్‌-అనన్య.. ఇప్పుడిలా..!

ముంబయి: బాలీవుడ్‌ ప్రముఖ నిర్మాత కరణ్‌ జోహార్‌ వ్యాఖ్యాతగా ప్రేక్షకాదరణ పొందిన సెలబ్రిటీ చాట్‌ షో ‘కాఫీ విత్‌ కరణ్‌’. 6 సీజన్లపాటు సాగిన ఈ షోలో ఎంతోమంది బాలీవుడ్‌ సెలబ్రిటీలు పాల్గొని తమ సినిమాలను ప్రమోట్‌ చేసుకున్నారు. ఎన్నో ఏళ్ల పాటు సక్సెస్‌ఫుల్‌గా సాగిన ఈ షో సరికొత్త సీజన్‌ రానున్న రోజుల్లో డిస్నీ ప్లస్‌ హాట్‌స్టార్‌ వేదికగా ప్రేక్షకులను అలరించనుంది. ఈ నేపథ్యంలో కరణ్‌ షోలో పాల్గొనే సెలబ్రిటీల జాబితా నెట్టింట తెగ చక్కర్లు కొట్టింది. ఈ జాబితాలో విజయ్‌ దేవరకొండ-రష్మిక ఉన్నారంటూ మొన్నటిదాకా ప్రచారం సాగింది. ఆ వార్తలన్నీ అవాస్తవాలని.. తన మొదటి పాన్‌ ఇండియా ప్రాజెక్ట్‌ ‘లైగర్‌’ రిలీజ్‌ని దృష్టిలో ఉంచుకుని .. విజయ్‌-అనన్య ఈ షోలో పాల్గొంటున్నారని మరికొంతమంది చెప్పుకొన్నారు. తాజా సమాచారం మేరకు కరణ్‌ షోలో విజయ్‌ దేవరకొండ ఒక్కడే పాల్గొన్నట్లు తెలుస్తోంది. ఇప్పటికే ఈ ఎపిసోడ్‌ షూట్‌ కూడా పూర్తైందంటూ, సెట్‌లో విజయ్‌ సంతకం చేసిన ఓ కాఫీ కప్‌ ఫొటో అంటూ పలువురు ప్రచారం చేస్తున్నారు. ఇక, కిక్‌ బాక్సింగ్‌ నేపథ్యంలో రూపుదిద్దుకున్న ‘లైగర్‌’ చిత్రానికి పూరీ జగన్నాథ్‌ దర్శకత్వం వహించారు. విజయ్‌-అనన్య జంటగా నటించిన ఈసినిమాలో రమ్యకృష్ణ, మైక్‌ టైసన్‌ కీలకపాత్రలు పోషించారు. ధర్మా ప్రొడెక్షన్స్‌, పూరీ కనెక్ట్స్‌ సంయుక్తంగా ఈ చిత్రాన్ని నిర్మిస్తున్నాయి. ఆగస్టు నెలలో ఈసినిమా ప్రేక్షకుల ముందుకు రానుంది.