YASH: కొత్తింట్లోకి అడుగుపెట్టిన యశ్‌

బెంగళూరు: కన్నడ స్టార్‌ హీరో యశ్ కొత్తింటిలోకి అడుగుపెట్టారు. బెంగళూరులోని అత్యంత ఖరీదైన ప్రెస్టీజ్ గోల్ఫ్ అపార్ట్‌మెంట్స్‌లో యశ్‌ ఓ ఇంటిని కొనుగోలు చేశారు. ఈ మేరకు యశ్‌ - రాధికా పండిట్‌ దంపతులు గురువారం ఉదయం నూతన గృహంలోకి అడుగుపెట్టారు. పూజా కార్యక్రమాలు నిర్వహించారు. దీనికి సంబంధించిన కొన్ని ఫొటోలు తాజాగా నెట్టింట్లో వైరల్‌గా మారాయి. ఈ నూతన గృహప్రవేశ వేడుకలో యశ్‌ తల్లిదండ్రులతోపాటు ఇతర కుటుంబసభ్యులు, అత్యంత ఆప్తులు మాత్రమే పాల్గొన్నారు. మరోవైపు, తమ అభిరుచులకు అద్దం పట్టేలా యశ్‌-రాధిక ఈ ఇంటిని డిజైన్‌ చేయించుకోనున్నారు.

యశ్‌ ప్రస్తుతం ‘కేజీఎఫ్‌-2’ రిలీజ్‌ పనుల్లో బిజీగా ఉన్నారు. ప్రశాంత్‌ నీల్‌ దర్శకత్వం వహించిన ఈ సినిమాలో ఆయన రాఖీబాయ్‌గా కనిపించనున్నారు. బాలీవుడ్‌ నటుడు సంజయ్‌ దత్‌ ఈ సినిమాలో ప్రతినాయకుడి పాత్ర పోషించారు. రవీనా టాండన్‌, రావు రమేష్‌, ప్రకాశ్‌రాజ్‌ ఈ సినిమాలో కీలకపాత్రల్లో నటించారు.