పొట్టికప్పునకు హార్దిక్‌ ఎంపికవుతాడా?

దిల్లీ: ఆల్‌రౌండర్‌ హార్దిక్‌ పాండ్య బౌలింగ్‌ చేయలేకపోతే టీ20 ప్రపంచకప్‌లో పాల్గొనే భారత జట్టుకు ఎంపికవుతాడా అని ప్రముఖ వ్యాఖ్యాత హర్ష భోగ్లే ప్రశ్నించాడు. చీలమండ గాయం కారణంగా అయిదు నెలలు ఆటకు దూరంగా ఉన్న పాండ్య.. ముంబయి ఇండియన్స్‌ కెప్టెన్‌గా ఐపీఎల్‌తో పునరాగమనం చేశాడు. అయితే ఫిట్‌నెస్‌ సమస్యలతో పాండ్య పూర్తి స్థాయిలో బౌలింగ్‌ చేయలేకపోతున్నాడు. ‘‘బౌలింగ్‌ చేయలేకపోయినా టీ20 ప్రపంచకప్‌కు హార్దిక్‌ ఎంపికవుతాడా? బౌలింగ్‌ చేయకపోతే భారత్‌లో టాప్‌-6   బ్యాటర్లలో పాండ్య ఉండగలడా? దీనిపై పూర్తిగా ఏకీభవించలేకపోతున్నా. అత్యున్నత స్థాయి టోర్నీలో బౌలింగ్‌ చేయనప్పుడు బ్యాటర్‌గా మెరుగ్గా రాణించాలి’’ అని భోగ్లే అన్నాడు.