ఫోన్‌ బ్యాటరీ ఎన్నిసార్లు ఛార్జ్‌ అవుతుంది?

స్మార్ట్‌ఫోన్‌ బ్యాటరీ పూర్తిగా.. అంటే 0 నుంచి 100% వరకు ఎన్నిసార్లు ఛార్జ్‌ అవుతుంది? ఎవరు లెక్కపెట్టొచ్చారని పెదవి విరవకండి. దీని గురించి తెలిస్తే బ్యాటరీ ఎక్కువ కాలం మన్నేలా కాపాడుకోవచ్చు మరి. సాధారణంగా చాలా ఫోన్‌ బ్యాటరీలను 300 నుంచి 500 సార్ల వరకూ పూర్తిగా ఛార్జ్‌ అయ్యేలా రూపొందిస్తుంటారు. ఛార్జింగుల సంఖ్య అంతకుమించిన కొద్దీ బ్యాటరీ మన్నిక తగ్గుతూ వస్తుంది. త్వరగా నిండుకుంటుంది. బ్యాటరీ ఛార్జింగ్‌ను 20% కన్నా తగ్గకుండా, 80% కన్నా మించకుండా చూసుకుంటే ఎక్కువకాలం మన్నే అవకాశముంది. ఎవరు వేచి చూస్తారని కొందరు రాత్రంతా ఛార్జింగ్‌ పెట్టేసి, పొద్దున తీసేస్తుంటారు. ఇలాంటి పని మాత్రం చేయొద్దు. ఎప్పుడన్నా ఒకసారి ఫోన్‌ బ్యాటరీ 100% నుంచి 0 శాతానికి చేరుకునేంతవరకు వాడుకోవటమూ మంచిదే. దీంతో బ్యాటరీ రీక్యాలిబరేట్‌ అయ్యే అవకాశముంది.