వాట్సప్‌ మెసేజ్‌లు రహస్యంగా..

వాట్సప్‌ మెసేజ్‌ల బ్లూటిక్‌ గురించి తెలిసిందే. దీంతో మెసేజ్‌లను చదివారో లేదో అనే విషయం పంపించినవారికి తెలుస్తుంది. బ్లూటిక్‌ లేకపోతే చదవలేదనే అర్థం. అయితే కొన్నిసార్లు మనం చదివినా ఆ విషయం పంపించినవారికి తెలియకూడదనే సందర్భాలు ఎదురవ్వచ్చు. అప్పుడెలా? దీనికీ అవకాశముంది. అదీ థర్డ్‌ పార్టీ యాప్‌లతో పనిలేకుండా. రీడ్‌ రిసిప్ట్స్‌ను డిసేబుల్‌ చేయటం, చిన్నపాటి ఉపాయాలతో ఆఫ్‌లైన్‌లో చూడటం ద్వారా దీన్ని సాధించొచ్చు.
* వాట్సప్‌ను ఓపెన్‌ చేసి నిలువు మూడు చుక్కల మీద నొక్కాలి.
* తర్వాత సెటింగ్స్‌ను ఎంచుకొని, అకౌంట్‌ ఆప్షన్‌ మీద ట్యాప్‌ చేయాలి.
* ‘ప్రైవసీ’ విభాగం మీద తాకి అడ్వాన్స్‌డ్‌ ఫీచర్లను పరిశీలించాలి. రీడ్‌ రిసిప్ట్స్‌ ఫీచర్‌ను డిసేబుల్‌ చేయాలి. అంతే.

నోటిఫికేషన్‌ బార్‌ ద్వారా
* రహస్యంగా మెసేజ్‌లను చదవటానికి ఉన్న మరో మార్గం నోటిఫికేషన్‌ బార్‌ ద్వారా చదవటం. వాట్సప్‌ మెసేజ్‌ నోటిఫికేషన్‌ అందిన వెంటనే దాన్ని కిందికి జరిపి చదివితే చాలు.

పాపప్స్‌ ద్వారా
* వాట్సప్‌ సెటింగ్స్‌ను ఓపెన్‌ చేసి, నోటిఫికేషన్స్‌ మీద తాకాలి.
* పాపప్‌ నోటిఫికేషన్‌ ఫీచర్‌ మీద తాకాలి. ఇందులో ఓన్లీ వెన్‌ ద స్క్రీన్‌ ఈజ్‌ ఆఫ్‌, ఆల్వేస్‌ షో పాపప్‌, ఓన్లీ వెన్‌ స్క్రీన్‌ ఈజ్‌ ఆన్‌.. ఈ మూడు ఆప్షన్లలో ఏదైనా ఒకటి ఎంచుకోవాలి.
* అప్పుడు నోటిఫికేషన్లు పాపప్‌ రూపంలో కనిపిస్తాయి. వాటిని చదివితే బ్లూటిక్‌ పడదు.

విడ్జెట్‌ ద్వారా
* వాట్సప్‌ మెసేజ్‌లను విడ్జెట్‌ ద్వారా చదవాలని అనుకుంటే.. వాట్సప్‌ను హోం స్క్రీన్‌ మీదికి తెచ్చుకుంటే చాలు. యాప్‌ను ఓపెన్‌ చేయకుండానే అన్ని మెసేజ్‌లనూ చదవొచ్చు.