రూ.1,534 కోట్లతో అచ్చంపేట ఎత్తిపోతలకు పరిపాలన అనుమతులు!

ఈనాడు, హైదరాబాద్‌: కృష్ణా జలాల ఆధారంగా నాగర్‌కర్నూల్‌ జిల్లా అచ్చంపేట నియోజకవర్గంలోని ఆయకట్టుకు సాగునీరు అందించేందుకు నిర్మించనున్న ఎత్తిపోతల పథకానికి రూ.1534 కోట్లకు పరిపాలన అనుమతులు మంజూరు చేస్తూ ప్రభుత్వం బుధవారం ఉత్తర్వులు జారీ చేసినట్లు తెలిసింది. అచ్చంపేట నియోజకవర్గంలో 57,200 ఎకరాలకు ఈ ఎత్తిపోతల పథకం ద్వారా సాగునీరు అందించాలనేది లక్ష్యం. గత కొంతకాలంగా అచ్చంపేట, అమ్రాబాద్‌ మండలాలతో పాటు పరిసర ప్రాంతాలకు తాగు, సాగునీరు అందించేందుకు నీటిపారుదలశాఖ పలు ప్రతిపాదనలు రూపొందించింది. ఈ క్రమంలో ఎత్తిపోతల నిర్మాణానికి తాజాగా ఉత్తర్వులు జారీ చేసినట్లు సమాచారం.