విద్యుత్తు తీగలు తెగిపడి నిలిచిన రైళ్లు

కాజీపేట, గిర్మాజిపేట, న్యూస్‌టుడే : వరంగల్‌ జిల్లా చింతలపల్లి రైల్వేస్టేషన్‌ వద్ద ఆదివారం రాత్రి విద్యుత్తు తీగలు (ఓహెచ్‌ఈ) తెగిపడటంతో రైళ్ల రాకపోకలకు అంతరాయం ఏర్పడింది. ఈదురు గాలులకు విద్యుత్తు తీగల మీద చెట్లకొమ్మలు పడడంతో అవి తెగి కింద పడ్డాయి. దీంతో కరెంటు సరఫరా నిలిచిపోయి రైళ్లు ఎక్కడికక్కడే ఆగిపోయాయి. సికింద్రాబాదు నుంచి చెన్నై వెళ్లే చార్మినార్‌ ఎక్స్‌ప్రెస్‌, తిరుపతికి వెళ్లే పద్మావతి ఎక్స్‌ప్రెస్‌లను కాజీపేట, వరంగల్‌ రైల్వేస్టేషన్లలో నిలిపివేశారు. కాజీపేటటౌన్‌ స్టేషన్‌లో బిలాస్‌పూర్‌, కరీంనగర్‌-తిరుపతి, కాచిగూడ-విశాఖపట్నం రైళ్లు ఆగాయి. పద్మావతి, చార్మినార్‌ ఎక్స్‌ప్రెస్‌లకు విద్యుత్తు ఇంజిన్లను తొలగించి వాటి స్థానంలో డీజిల్‌ ఇంజిన్లను అమర్చి నడిపించేందుకు అధికారులు కృషి చేస్తున్నారు. రాత్రి 12 గంటల వరకు కూడా విద్యుత్తు సరఫరాను పునరుద్ధరించలేదు. దీంతో ప్రయాణికులు ఇబ్బందులు పడుతున్నారు.