Air India: ఎయిర్ ఇండియా చేతికి బాహుబలి విమానం

Air India | దిల్లీ: టాటా గ్రూప్‌ నేతృత్వంలోని ఎయిరిండియా (Air India) చేతికి మొట్టమొదటి వైడ్‌ - బాడీ ఏ350-900 (VT-JRA) విమానం అందింది. ఈ బాహుబలి విమానం ఫ్రాన్స్‌లోని ప్రముఖ విమాన తయారీ సంస్థ ఎయిర్‌బస్‌ (Airbus) నుంచి దిల్లీలోని ఇందిరాగాంధీ అంతర్జాతీయ విమానాశ్రయానికి చేరుకుంది. దీంతో ఈ తరహా విమానాలను కలిగి ఉన్న మొదటి విమానయాన సంస్థగా ఎయిరిండియా నిలిచింది. ఈ విషయాన్ని సంస్థ ‘ఎక్స్‌’ ద్వారా పంచుకుంది.

ఎయిర్‌బస్‌ నుంచి పెద్ద సంఖ్యలో విమానాల కొనుగోలుకు ఎయిరిండియా ఆర్డర్‌ పెట్టిన సంగతి తెలిసిందే. అందులో ఎయిర్‌బస్‌ వైడ్‌ బాడీ విమానాలు 20 ఉన్నాయి. వీటిలో తొలి విమానమైన ఏ350- 900 తాజాగా ఎయిర్‌ఇండియా చేతికి వచ్చింది. మరో ఐదు విమానాలు వచ్చే ఏడాది మార్చి నాటికి అందుబాటులోకి రానున్నాయని సంస్థ పేర్కొంది. ఎయిర్‌బస్‌కు ఆర్డర్‌ పెట్టిన వాటిలో 40 ఏ350లు, 20 ఏ350-900, 20 ఏ350-1000 విమానాలు, 140 నారో బాడీ ఏ321 నియో, 70 ఏ320 నియో విమానాలు ఉన్నాయి.

నెలల ముందే రిటర్ను పత్రాలు నోటిఫై చేసిన సీబీడీటీ

ఏ350-900 విమానంతో సూదూర మార్గాల్లో నాన్‌స్టాప్‌గా ప్రయాణించొచ్చని ఎయిరిండియా చీఫ్ ఎగ్జిక్యూటివ్ ఆఫీసర్, మేనేజింగ్ డైరెక్టర్ క్యాంప్‌బెల్ విల్సన్ అన్నారు. ఈ విమానాలను మొదట తక్కువ దూరం ఉన్న మార్గాల్లో వినియోగించి తర్వాత సుదూర ప్రయాణాలకు వినియోగించనున్నట్లు సంస్థ ఇప్పటికే ప్రకటించింది. వచ్చే ఏడాది జనవరి నుంచి ఈ విమానాలు వాణిజ్య సేవలు అందిస్తాయని ఎయిర్‌లైన్స్ తెలిపింది. 316 మందితో ఒకేసారి ప్రయాణించగలిగే ఈ విమానంలో 28 ప్రైవేట్ బిజినెస్ క్లాస్ సూట్‌లు, అదనపు లెగ్‌రూమ్‌లతో కూడిన 24 ప్రీమియం ఎకానమీ సీట్లు, 264 విశాలమైన ఎకానమీ క్లాస్ సీట్లు ఉంటాయని ఎయిరిండియా తెలిపింది.