FD Rates: వడ్డీ రేట్లను సవరించిన బ్యాంక్‌ ఆఫ్‌ బరోడా

దిల్లీ: బ్యాంక్‌ ఆఫ్‌ బరోడా తమ ఎఫ్‌డీలపై వడ్డీ రేట్లను 30 బేసిస్‌ పాయింట్ల వరకు పెంచింది. సీనియర్‌ సిటిజన్లు ఈ బ్యాంకులో గరిష్ఠంగా 7.75% వరకు వడ్డీ రేటును పొందొచ్చు. 7-14 రోజుల కనీస డిపాజిట్‌పై సాధారణ డిపాజిటర్లు 3% వడ్డీ, సీనియర్‌ సిటిజన్లు 3.50% వడ్డీని ఈ బ్యాంకులో పొందొచ్చు. ఒక ఏడాది డిపాజిట్‌పై సాధారణ డిపాజిటర్లు 6.75% వడ్డీని పొందుతుండగా.. ఇదే డిపాజిట్‌పై సీనియర్‌ సిటిజన్లకు 7.25% వడ్డీ లభిస్తుంది. 399 రోజుల (బరోడా తిరంగా ప్లస్‌) ప్రత్యేక డిపాజిట్‌పై సాధారణ డిపాజిటర్లు 7.25% వడ్డీని పొందుతారు. సీనియర్‌ సిటిజన్లు ఇదే డిపాజిట్‌పై 7.75% వరకు వడ్డీ పొందొచ్చు. ఈ బ్యాంకులో ఇదే గరిష్ఠ వడ్డీ రేటు. ఈ బ్యాంకులో 10 సంవత్సరాల వరకు ఎఫ్‌డీలు చేయొచ్చు. ఈ వడ్డీ రేట్లు రూ.2 కోట్ల లోపు డిపాజిట్లకు వర్తిస్తాయి. సవరించిన రేట్లు 2023 మే 12 నుంచి అమల్లోకి వచ్చాయి.