Work From Home: ప్రత్యేక ఆర్థిక మండలిలో ఏడాది వరకే ‘ఇంటి నుంచి పని’

గరిష్ఠంగా 50% మంది ఉద్యోగులకే అనుమతి

వాణిజ్య మంత్రిత్వ శాఖ స్పష్టీకరణ

దిల్లీ: ఒక ప్రత్యేక ఆర్థిక మండలి (SEZ) యూనిట్‌లో గరిష్ఠంగా ఏడాది పాటే ‘ఇంటి నుంచి పని (Work From Home)’ (WFH)కి అనుమతి ఉంటుందని.. మొత్తం ఉద్యోగుల్లో 50 శాతం మందికి ఈ అవకాశం ఇవ్వొచ్చని వాణిజ్య మంత్రిత్వ శాఖ వెల్లడించింది. ఆ మేరకు ‘స్పెషల్‌ ఎకనమిక్‌ జోన్స్‌ రూల్స్‌ 2006’లో కొత్త నిబంధన 43ఏను వాణిజ్య విభాగం నోటిఫై చేసింది. దేశవ్యాప్తంగా ఉన్న అన్ని ప్రత్యేక ఆర్థిక మండళ్ల (SEZ) లో ఏకరీతిన డబ్ల్యూఎఫ్‌హెచ్‌ (Work From Home) విధానం ఉండడం కోసం పరిశ్రమ నుంచి వచ్చిన డిమాండ్ల నేపథ్యంలో ఈ నోటిఫికేషన్‌ జారీ చేసినట్లు మంత్రిత్వ శాఖ స్పష్టం చేసింది. తాజా నిబంధనతో ఎస్‌ఈజడ్‌ (SEZ)లోని ఒక యూనిట్‌కు చెందిన నిర్దిష్ట విభాగ ఉద్యోగులకు ఇంటి నుంచి పనిని ఇవ్వడానికి వీలు కలిగినట్లయింది. 

ఎవరికంటే: ఐటీ/ఐటీఈఎస్‌ ఎస్‌ఈజడ్‌ (SEZ) యూనిట్లలోని ఉద్యోగులు
* ప్రయాణంలో ఉండే, ఆఫ్‌సైట్‌లో పనిచేసే ఉద్యోగులు
* తాత్కాలికంగా కార్యాలయానికి రాలేని ఉద్యోగులు

ఇంత మందికే..: కాంట్రాక్టు ఉద్యోగులతో కలిపి మొత్తం ఉద్యోగుల్లో గరిష్ఠంగా 50 శాతం మందికి ఇంటి నుంచి పనిని అప్పజెప్పవచ్చు.
* ఏదైనా సరైన కారణం ఉంటే, దానిని ఎస్‌ఈజడ్‌కు చెందిన డెవలప్‌మెంట్‌ కమిషనర్‌(డీసీ) రాతపూర్వకంగా తెలిపి, 50 శాతం కంటే ఎక్కువ మందికి సైతం అనుమతి ఇవ్వవచ్చు.

ఎంత కాలం అంటే..
* గరిష్ఠంగా ఏడాది పాటు అనుమతి ఇవ్వవచ్చు. అయితే యూనిట్ల విజ్ఞప్తి మేరకు మరో ఏడాది పాటు డీసీ దానిని పొడిగించవచ్చు.
* ఇప్పటికే ఎస్‌ఈజడ్‌ యూనిట్లకు చెందిన ఉద్యోగులు ఇంటి నుంచి పని చేస్తుంటే తాజా నోటిఫికేషన్‌ ప్రకారం అనుమతి పొందడానికి 90 రోజుల సమయాన్ని ఇచ్చారు.