ఏషియన్‌ పెయింట్స్‌ తుది డివిడెండ్‌ 2815%

దిల్లీ: ఏషియన్‌ పెయింట్స్‌, గత ఆర్థిక సంవత్సరం మార్చి త్రైమాసికంలో రూ.1,275.3 కోట్ల ఏకీకృత నికర లాభాన్ని నమోదు చేసింది. 2022-23 ఇదే కాల లాభం రూ.1,258.41 కోట్లతో పోలిస్తే ఇది  1.34% ఎక్కువ. ఇదే సమయంలో కార్యకలాపాల ఆదాయం రూ.8,787.34 కోట్ల నుంచి రూ.8,730.76 కోట్లకు తగ్గింది. మొత్తం వ్యయాలు రూ.7,181.66 కోట్ల నుంచి రూ.7,319.1 కోట్లకు పెరిగాయి.

• 2023-24 పూర్తి ఆర్థిక సంవత్సరానికి ఏకీకృత నికర లాభం రూ.4,195.33 కోట్ల నుంచి రూ.5,557.69 కోట్లకు పెరిగింది. కార్యకలాపాల ఆదాయం రూ.34,488.59 కోట్ల నుంచి రూ.35,494.73 కోట్లకు చేరింది.
• రూ.1 ముఖ విలువ కలిగిన ఒక్కో షేరుకు రూ.28.15 (2,815%) తుది డివిడెండ్‌ చెల్లించేందుకు కంపెనీ బోర్డు ప్రతిపాదించింది. 2023 అక్టోబరులో ప్రకటించిన రూ.5.15 మధ్యంతర డివిడెండ్‌కు ఇది అదనం. అంటే మొత్తం డివిడెండ్‌ రూ.33.30కు చేరింది.
• 2023-24లో రూ.35,000 కోట్ల ఏకీకృత ఆదాయం మైలురాయిని అధిగమించామని ఏషియన్‌ పెయింట్స్‌ ఎండీ, సీఈఓ అమిత్‌ సింగ్లే వెల్లడించారు. డెకరేటివ్‌, పారిశ్రామిక కోటింగ్స్‌ల సంయుక్త పరిమాణ వృద్ధి 10%, విలువ వృద్ధి 3.9%, పారిశ్రామిక విభాగ విలువ వృద్ధి రెండంకెల స్థాయికి పెరిగినట్లు తెలిపారు. అంతర్జాతీయ వ్యాపారమూ స్థిర వృద్ధితో కొనసాగుతోందని తెలిపారు.