Anant-Radhika: అనంత్‌-రాధిక హస్తాక్షర్‌.. ఆకట్టుకున్న నీతా నాట్యం

ముంబయి: అనంత్‌ అంబానీ-రాధికా మర్చంట్ (Anant Ambani-Radhika Merchant) ప్రీవెడ్డింగ్ వేడుకలు ఘనంగా జరిగాయి. ఆదివారం సాయంత్రం ‘హస్తాక్షర్’(సంతకం) తో వాటికి ముగింపు పలికారు. ఈ సందర్భంగా కాబోయే వధూవరులు సంప్రదాయ దుస్తుల్లో తళుక్కుమన్నారు.

హస్తాక్షర్ వేడుకలో భాగంగా సోదరి ఈశా అంబానీ, వదిన శ్లోకామెహతా.. అనంత్‌ను  వేదికవద్దకు తీసుకువచ్చారు. ఆ తర్వాత అంబానీ కుటుంబమంతా రాధిక రాక కోసం ఎదురుచూసింది. ‘కభీకుషీ కభీఘమ్‌’లోని పాట పాడుతూ ఆమె ఎంట్రీ ఇచ్చారు. ఆ సమయంలో ముకేశ్‌, నీతా అమితానందంతో కనిపించారు. తర్వాత అనంత్‌-రాధిక ఒక పండితుడి సమక్షంలో సంతకాలు చేశారు.

ఇదిలా ఉంటే.. చివరి రోజు నీతా అంబానీ ‘విశ్వంభరి స్తుతి’ పేరిట చేసిన నృత్య ప్రదర్శన అతిథులను అలరించింది. కాబోయే భార్యాభర్తలకు అమ్మవారి ఆశీస్సులను కోరుతూ ఆ నాట్యం చేశారు. మనవరాళ్లు ఆదియా శక్తి, వేదకు అంకితం చేశారు. కాగా.. గుజరాత్‌లోని జామ్‌ నగర్‌లో మూడురోజుల పాటు జరిగిన ప్రీవెడ్డింగ్ వేడుకల్లో వెయ్యిమంది దేశీయ, అంతర్జాతీయ స్థాయి ప్రముఖులు పాల్గొన్నారు. హాలీవుడ్ పాప్‌ గాయని రిహన్నా..తదితరులు ప్రదర్శనలు ఇచ్చారు.